Испания Англияга қарши кечган ёрқин ўйинда ғалабани ўз томонига оғдира олди. Амалдаги жаҳон чемпионлари 2-дақиқадаёқ ҳисобни очишди: «Сити» ҳимоячиси Марк Гейи қўпол хатога йўл қўйди ва Ламин Ямал бундан фойдаланди.
Бу испанлар учун расмий ўйинларда 2005 йил октябридан буён урилган энг тезкор гол бўлди, ўшанда Антонио Лопес ЖЧ-2006 саралаши доирасида Сан-Марино дарвозасини 53-дақиқада ишғол этганди. Бу шунингдек «Уэмбли»да меҳмон жамоалар 1957 йилдан буён урган энг тезкор гол бўлди, ўшанда шотландиялик Томми Ринг Англияга қарши ўйиннинг 1-дақиқасида ҳисобни очганди.
Кўп ўтмай Ферран Торрес ҳам гол урди, аммо у офсайдда қолгани маълум бўлди. Танаффус арафасида эса инглизлар ўйинни кучайтиришди: 36-дақиқада аввалига Энтони Гордон ҳисобни тенглаштирди, тўрт дақиқа ўтиб Ҳарри Кейн жамоасини олдинга олиб чиқди.
Иккинчи бўлим бошида Англия орадаги тўп фарқини ошириб қўйиши мумкин эди. Жуд Беллингҳэм жарима майдони ичида Родри билан контактдан кейин йиқилди. Ўйин бош ҳаками Давиде Масса аввалига фолни қайд этмаганди, кейин эса VAR аралашуви билан пеналти белгиланди.
Аммо зарба бериш чоғида Кейн тойиб кетди, тўп эса тўсинга учиб борди.
Бу ўйиннинг ҳал қилувчи лаҳзаси эди, ўйинда интригани сақлаб қолган испанлар яна иккита гол уришди. Кейннинг муваффақиятсиз зарбасидан беш дақиқа ўтиб захирадан ўйинга қўшилган Алекс Баэна ҳисобни тенглаштирди. Захирадан тушган яна бир футболчи Микел Ойарсабал 74-дақиқада ғалаба голини урди – 3:2.
Мавзуга оид
Испания қаторасига 39 ўйинда асосий вақтда ютқазмаяпти ва бу рекорд кўрсаткич ҳисобланади (испанлар ёзда ЖЧ финалида мағлубиятсиз ўйинлари сериясини 38 тага етказиб, рекорд ўрнатганди). Ушбу серия 2024 йил мартидан буён давом этиб келмоқда. Жамоанинг сўнгги мағлубияти Колумбияга қарши ўртоқлик учрашувида рўй берганди (0:1). Шунингдек, 2025 йилда Миллатлар лигасида Португалиядан мағлуб бўлинган, аммо ўшанда ўйин пеналтилар сериясигача борганди (2:2, 3-5).
Испания сўнгги 13 ўйинда илк бор бир ўйинда биттадан ортиқ гол ўтказиб юборди. Испанлар охирги бор 2025 йил ноябрида ЖЧ-2026 саралаши доирасида Туркиядан икки гол ўтказиб юборганди (2:2).
14 йилдан кейин Хорватия миллий жамоаси бош мураббийи лавозимига қайтган Славен Билич ўз расмий дебютида Батуриндан фойдалана олмади, «Комо» футболчисининг тана ҳарорати кўтарилиб кетган ва у фақат кейинги турда Испанияга қарши ўйинга тайёр бўлади. Лекин шу куни кексалик билмас 41 ёшли Лука Модрич майдонда эди. Айнан у иккинчи бўлим бошида жарима майдони ташқарисидан йўллаган кучли зарбаси билан ҳисобни очди. У ёзда миллий жамоадаги фаолиятини якунлаш ҳақида ўйлаётганди, лекин ҳамон жамоага фойда келтиришда давом этмоқда.
Аммо 2024 йил Испания олимпия жамоаси билан Олимпиада ғолиблигини қўлга киритган Сантияго Дения бошқарувида янги даврни бошлаган Чехия таслим бўлмади ва ҳисобни тенглаштирди. Бу голли ҳужумда аввалига Гвардиол, кейин Вушкович навбати билан хатога йўл қўйди ва Адам Карабец дарвозабон билан яккама-якка вазиятга чиқиб кетди. Хорватлар яна бир гол ўтказиб юбориши мумкин эди, аммо Радоста қулай вазиятдан тўғри зарба бера олмади. Кейин эса хорватлар вазиятдан фойдаланиш бўйича дарс ўтишди ва Марко Пашалич таркибдаги яна бир кексаликни тан олмайдиган футболчи Иван Перишичнинг узатмасидан ғалаба голини урди.
Шотландияда ҳам Стив Кларкнинг етти йиллик бошқарувидан кейинги давр бошланди. Жамоани 28 йил ичида илк бор мундиалга олиб чиққан ушбу мутахассис гуруҳдаги муваффақиятсизликдан кейин истеъфо берганди. Энди унинг ўрнига шотландларни Себастиен Покониоли бошқармоқда. Аммо унинг бошқарувидаги илк ўйинда жамоага Скотт Мактоминай етишмади. Словения ҳам шу куни асосий ҳужумчиси Шешкосиз ҳаракат қилди. Натижада ўйинда мухлислар гол кўришмади – 0:0. Шотландлар нисбатан яхшироқ ўйнашди ва 17 бор зарба беришди (словенларда атиги 4 та). Ўз майдонида ўйнаган Словения фақат Ян Облакнинг сэйвлари (5 та) эвазига очко олишга муваффақ бўлди.
Шотландлар ва словенлар ўртасидаги дуранг гуруҳ фаворити Швейцария фойдасига ишлади. Ушбу жамоа сафарда икки етакчисисиз ўйнашига тўғри келди – ўз вақтида коронавирусга қарши эмлангани тўғрисида сохта маълумот тақдим этган Жака ва Эмболо жамоадан четлатилган. Лекин уларнинг йўқлиги Мурат Якин жамоасига ўйинни тўлиқ назорат қилишга тўсқинлик қилмади. Жамоа ҳужумчиси Амдуни аввалига Фройлерга голли узатма берди, кейин эса шу куни миллий жамоада дебютини амалга оширган Атекаменинг пасини голга айлантирди. Ўйинда ҳисоб биринчи бўлимдаёқ йирик кўриниш олиши мумкин эди, аммо Ндойенинг зарбасидан кейин дарвозабон Дмитриевски қаҳрамонлик кўрсатди. Иккинчи бўлимда Амдуни барибир ҳисобни йирик кўринишга келтирди. «Бёрнли» форварди яна жарима майдони марказида тўпни Атекамедан қабул қилиб олиб, бир ҳаракат билан ҳимоячини алдади ва тўпни бурчакка аниқ йўналтирди.
29 сентябр. Словения – Шимолий Македония, Шотландия – Швейцария
Қозоғистонда яна қайта қуриш кетмоқда. 2026 йилги ЖЧ саралашининг иккинчи қисмида яхши ишлаган Талгат Байсуфинов шу йил ёзда етарлича қўллаб-қувватлов бўлмагани ҳолда мураббийлар штабидан максимал натижа талаб қилиш тўғри эмаслигини айтиб, истеъфога чиқди. Кейин эса федерация кўпчиликни ажаблантирган ҳолда унинг ўрнига Йон ван'т Схипни тайинлади: ушбу нидерландиялик мутахассис бунгача Арманистон миллий жамоаси бошқарувида муваффақиятсизликка учраб, тайинланганидан ярим йил ўтганида ишдан бўшатилган, бунга қаторасига тўрт ўйиндаги оғриқли мағлубиятлар сабаб бўлганди.
Ушбу мутахассис ўз дебют ўйинида ғалабага эриша олмади. Фарер оролларига қарши ўйин рақибнинг тезкор голи билан бошланди. Самуэлсен бир тегинишда тўпни тўққизликка жойлади, аммо бўлим охирида Ерланов Исламхан бурчакдан оширган тўпга аниқ зарба бериб, ҳисобни тенглаштирди. Иккинчи бўлимда қозоғистонликлар дурангни қўлдан чиқариши мумкин эди, аммо дарвозабон Стас Покатилов бир неча марта, жумладан, яккама-якка вазиятда қутқарди.
Словакия Молдовани осонлик билан таслим этди – 2:0. Бунда мезбонларга стандарт вазиятлар қўл келди: Иван Шранц 32-дақиқада бурчак зарбасидан кейин ҳисобни очди, 40-дақиқада Ондрей Дуда пеналтини аниқ ижро этди. Словаклар шу куни фаолроқ ўйнади ва ғалабага ҳақли эди.
Болгария – Люксембург 1:2 Голлар: Чандаров, 18 (1:0). Баррейру, 37 (1:1). В. Тилл, 65 (1:2) Болгария: Наумов, К. Димитров, Т. Иванов (Велков, 82), Велковски, Турицов, Груев, Чандаров (Минчев, 56), Ценов (Панайотов, 68), З. Димитров (М. Петков, 68), Русев (Ст. Иванов, 46), Л. Петков Люксембург: Мори, Махмутович, Карлсон, Бонерт, Янс, Морейра (Гонсалвеш, 90+2), Баррейру, Синани (Рупил, 46), Дардари (С. Тилл, 83), В. Тилл (Олесен, 72), Кадамани (Видейра, 83) Огоҳлантиришлар: Л. Петков, 28. Ценов, 35 – Морейра, 45. Карлсон, 83
Люксембург Болгария билан ўйинда бурилиш ясади – 2:1. 18-дақиқада Асен Чандаров мезбонларни ҳисобда олдинга олиб чиққанди, аммо стадионга йиғилган мухлислар меҳмонларнинг камбэкига гувоҳ бўлишди. Бўлим охирларида «Бенфика» яримҳимоячиси Леандро Баррейро шериги билан девор услубида ўйнаб, мувозанатни тиклади, иккинчи бўлимда эса Венсан Тилл бурчак тўпидан кейин ғалаба голини урди. Люксембург дарвозабони Антони Морис шу куни олтита сэйв амалга ошириб, ғалабага ўз ҳиссасини қўшди.
