DW нашри dpa агентлигига таяниб хабар беришича, Ироқ ҳукумати вакили бу ҳақда 28 сентябрга ўтар кечаси баёнот берган.
«Барча жанговар бўлинмалар ва логистика таъминотини амалга оширган кучлар мамлакатни тарк этди», — деган ҳукумат вакили.
АҚШ ва Ироқ Америка қўшинларини олиб чиқиш бўйича 2024 йилда келишувга эришган эди. Вашингтон маълумотларига кўра, сўнгги йилларда Ироқда қарийб 2 500 нафар АҚШ ҳарбийси жойлаштирилган.
Американинг сўнгги бўлинмалари Курдистон минтақасидаги Эрбил шаҳрида, Бағдод аэропорти яқинидаги ҳарбий базада ва пойтахтнинг ҳукумат идоралари жойлашган «яшил ҳудуд»ида бўлган.
ИШИДга қарши операция
АҚШ ва унинг иттифоқчилари 2014 йилдан буён Ироқ ҳамда Сурияда ИШИД террорчилик ташкилотига қарши кураш олиб борган.
Ташкилот ҳар икки мамлакатда илгари назорат қилган катта ҳудудларини йўқотган бўлса-да, унинг айрим яширин гуруҳлари сақланиб қолган ва ҳамон террорчилик ҳужумларини содир этмоқда.
dpa қайд этишича, Эрондаги уруш фонида Ироқдаги хавфсизлик вазияти ҳам ёмонлашган. Можаро давомида мамлакатдаги АҚШ объектлари ва курд кучларининг объектларига ҳужумлар уюштирилган.
Қуролли гуруҳларни қуролсизлантириш кечиктирилди
Агентлик маълумотига кўра, АҚШ қўшинларини олиб чиқиш муддати тугайдиган 28 сентябр куни Ироқда «Мустақиллик куни» сифатида байрам тадбирлари ўтказилиши кутилмоқда. Шу куни барча давлат муассасалари ёпиқ бўлиши айтилган.
Аввалги режага мувофиқ, Америка қўшинлари чиқиб кетиши билан бир вақтда Эронга алоқадор қуролли гуруҳлар қуролсизлантирилиши, уларнинг аъзолари эса давлат куч тузилмалари таркибига киритилиши керак эди.
Бироқ Ироқ бош вазири Али аз-Зайдий бу чора 2027 йил июнигача кечиктирилишини эълон қилган.
Германия Эрбилдаги иштирокини сақлаб қолиши мумкин
АҚШ ва унинг иттифоқчилари 2003 йилда Саддам Ҳусайн ҳокимиятини ағдариш мақсадида Ироққа бостириб кирган эди. Кейинчалик мамлакатдаги халқаро ҳарбий иштирокнинг асосий йўналишларидан бири ИШИДга қарши кураш бўлди.
