ДХХ Фарғона вилояти бўйича бошқармаси ходимлари вилоят Ички ишлар ва Божхона бошқармалари билан ҳамкорликда «Фарғона — Тошкент» йўналишида ҳаракатланаётган «Кобалт»ни Поп туманидаги «Наманган» ЙПХ масканида тўхтатган.
Текширувда Чирчиқ шаҳрида яшовчи, 1995 йилда туғилган фуқаро бошқарувидаги автомашина юкхонасига бир килограмм гашиш яширилгани аниқланган. Модда ашёвий далил сифатида олинган.
ДХХ Наманган вилояти бўйича бошқармаси, ички ишлар ва божхона органлари ҳамкорлигида Чуст туманида ўтказилган бошқа тадбирда «ВАЗ-2103» автомашинаси кўздан кечирилган. Янги Наманган туманида яшовчи, 1987 йилда туғилган, муқаддам судланган шахсга тегишли автомобилнинг салонидан 995 грамм гашиш топилган.
Яна бир ҳолатда Наманган шаҳрида истиқомат қилувчи, 1975 йилда туғилган фуқаронинг хонадони холислар иштирокида текширилган. Уйнинг ертўласидан 648 грамм гашиш олинган.
Хабарда қайд этилишича, хонадон эгаси ушбу гиёҳвандлик воситасини Янги Наманган туманида яшовчи, 1972 йилда туғилган танишидан 5 минг АҚШ долларига сотиб олгани аниқланган. Уни сотганликда гумон қилинаётган шахс ҳам процессуал тартибда ушланган.
Ҳолатлар юзасидан жиноят ишлари қўзғатилган. Ҳозирда тергов ҳаракатлари олиб борилмоқда.
