«Ўзбекистон Республикаси аҳолиси ва ҳудудининг сейсмик хавфсизлигини таъминлаш тўғрисида»ги қонунга киритилган ўзгартиш ва қўшимчаларга кўра, Вазирлар Маҳкамаси ҳузуридаги мазкур инспекция қурилаётган бино ва иншоотларнинг сейсмик хавфсизлиги норматив ҳужжатлар талабларига мувофиқлигини назорат қилади.
Инспекция электрон техник паспортлар асосида биноларни сейсмик заифлиги бўйича таснифлаш, уларни инструментал-техник текширувдан ўтказиш ҳамда зилзилабардошлигини ошириш ишларида иштирок этади.
Сейсмик фаол зоналарда қурилиши режалаштирилаётган ва инспекция назоратига кирувчи барча турдаги бино ва иншоотлар, шунингдек, кўп қаватли тураржойлар учун электрон техник паспортларни шакллантириш ҳам унинг ваколатига киради. Ушбу паспортларда биноларнинг сейсмик заифлигини баҳолаш учун зарур ахборот жамланади.
Бундан ташқари, инспекция янги қурилаётган биноларнинг зилзилабардошлигини таъминлаш ва мавжуд бино-иншоотларнинг зилзилабардошлигини ошириш учун зарур чораларни кўради.
Мастер-режа шаҳарсозлик ҳужжати сифатида белгиланмоқда
Ўзгартишлар билан шаҳарсозлик ҳужжатлари таркибига мастер-режа ҳам киритилмоқда.
Мастер-режа ҳудудлардаги аниқ муаммоларни бартараф этишга қаратилган, шаҳарсозлик, ижтимоий-иқтисодий, экологик ва бошқа лойиҳа ечимларини бирлаштирган ҳужжат сифатида таърифланган.
Қонун расмий эълон қилинган кундан эътиборан уч ой ўтгач кучга киради.
