5 октябр куни эълон қилинган фармойиш «ЮниКредит Банк» таркибидан алоҳида компания ажратиб чиқариш ҳамда банкнинг UniCredit’га тегишли 100 фоиз акцияси билан битим тузишга рухсат беради.
Ҳужжатда ушбу битимлар учун Россия қонунчилигида назарда тутилган бошқа рухсат ва келишувларни олиш талаб этилмаслиги белгиланган. Бироқ рухсат берилиши сотув якунланганини англатмайди.
UniCredit 2026 йил 7 майда Россиядаги фаолиятининг бир қисмини сотиш бўйича дастлабки, мажбурий кучга эга бўлмаган келишув имзолаганини маълум қилган. Харидор Бирлашган Араб Амирликларидаги хусусий инвестор экани айтилган, аммо унинг номи ошкор этилмаган.
Гуруҳнинг расмий баёнотига кўра, Россиядаги банк фаолиятининг бир қисми янги юридик шахсга ўтказилади. Янги банкнинг барча акциялари UniCredit’да қолади, қолган бизнесни ўз ичига олган банк эса харидорга тўлиқ сотилади.
Италия гуруҳи Россиядаги фаолиятини асосан халқаро тўловларга йўналтирмоқчи. Бунда санкцияларга тушмаган Россия ва Ғарб корпоратив мижозларининг, биринчи навбатда, евро ва АҚШ долларидаги операцияларига хизмат кўрсатиш кўзда тутилган.
Компания битимни 2027 йилнинг биринчи ярмида якунлашни режалаштирган. Бунинг учун мажбурий кучга эга ҳужжатларни имзолаш, бизнесни ажратиш жараёнини амалга ошириш ва тегишли регуляторлар талабларини бажариш зарурлиги қайд этилган.
Аввалроқ, 2025 йил майида ОАВ БААда рўйхатдан ўтган Asas Capital, Mada Capital ва Inweasta компаниялари UniCredit’нинг Россиядаги бизнесини сотиб олишга қизиқиш билдиргани ҳақида ёзган эди.
DW келтирган маълумотларга кўра, Inweasta асосчиси Андрей Елинсон 2023 йилгача «Альфа-групп»нинг инвестиция бўлинмаси — A1’да бошқарувчи ҳамкор бўлган. Бироқ ушбу компаниялардан бири ҳозирги битим харидори экани тасдиқланмаган.
UniCredit Россиянинг 2022 йилда Украинага кенг кўламли ҳужумидан кейин ҳам мамлакатда фаолиятини давом эттирган йирик Ғарб банкларидан бири бўлиб қолди. Европа регуляторлари гуруҳдан Россиядаги иштирокини қисқартиришни талаб қилиб келган.
Айни пайтда Россияда «дўст бўлмаган» давлатлар инвесторларига тегишли банк акциялари билан битимлар учун президентнинг махсус рухсати талаб қилиниши сотув жараёнини мураккаблаштирган. Путиннинг янги фармойиши UniCredit режалаштирган қайта ташкил этиш ва сотув учун шундай рухсатни беради.
