Нашр 8 октябрга ўтар кечаси эълон қилган хабарида ёнғин жойини гувоҳлар тасвирга олган кадрлар асосида аниқлаганини билдирган.
Astra, шунингдек, ўтган ой дата-марказ ходимлари у ердаги ускуналарни намойиш қилиб, объект Сасово шаҳрида жойлашганини айтганини қайд этган.
Кейинроқ Yandex Cloud булутли платформасининг алоҳида хизмат кўрсатиш зонасида электр таъминоти билан боғлиқ узилиш ҳақида хабар пайдо бўлган. Тахминан 40 дақиқадан сўнг платформа жамоаси вазият барқарорлашганини маълум қилган.
Бироқ ушбу узилиш айнан ёнғин оқибатида юз бергани ёки дата-марказнинг ўзига зарар етгани ҳақида келтирилган хабарларда аниқ тасдиқ йўқ. Ёнғиннинг сабаби ва зарар кўлами ҳам очиқланмаган.
«Саста» рақамли дастурий бошқарувга эга металлга ишлов бериш станокларини ишлаб чиқаради. Astra маълумотига кўра, корхона ускуналари мудофаа, аэрокосмик, транспорт ва оғир саноатда қўлланади.
Нашр заводнинг Россия ҳарбий-саноат мажмуаси учун аҳамияти тайёр қурол ишлаб чиқаришда эмас, балки юқори аниқликдаги металл деталлар ва узелларни тайёрлаш учун станоклар етказиб беришда эканини таъкидлаган.
Astra корхона Канада, Швейцария, Европа Иттифоқи, Буюк Британия, Австралия, Янги Зеландия ва Япония санкциялари остида эканини ҳам эслатган.
Аввалроқ, 25 сентябр кечқурун Россия қўшинларининг Украинадаги Cosmonova телекоммуникация оператори инфратузилмаси, жумладан, дата-марказига зарбалари ортидан Киевда интернет ва телевидение ишида узилишлар кузатилган эди.
Украина президенти Володимир Зеленский 3 октябрда дата-марказлар ва мобил алоқа объектларига ҳужумларни танқид қилиб, бундай зарбалар оддий аҳолига таъсир қилишини таъкидлаган.
