Полшада мамлакат бош вазири Доналд Туск ва мудофаа вазири Владислав Косиняк-Камишга нисбатан суиқасд уюштиришга тайёргарлик кўришда гумонланаётган шахс қўлга олинди. Бу ҳақда ички ишлар вазири Марцин Кервинский маълум қилди.
Тускнинг ўзи ҳам бу маълумотни тасдиқлади.
«Ҳужум қилиш билан таҳдид қилган эркак ушланди. Тезкор ва қатъий ҳаракати учун полиция ходимларига миннатдорлик билдираман»,— деб ёзди у X ижтимоий тармоғида.
Қўлга олиш тафсилотлари ва эркакнинг шахсига оид маълумотлар келтирилмаган.
Аввалроқ Полша полицияси электрон почта орқали ҳужумга тайёргарлик кўрилаётгани айтилган мактуб олганди. Полша ички хавфсизлик агентлигининг антитеррор хавфсизлик марказида шошилинч йиғилиш ўтказилган ва махсус хизматлар вакили Яцек Добжинский йиғилишдан сўнг ҳукумат бу таҳдидга «ўта жиддий» ёндашишини маълум қилганди.
