The Wall Street Journal нашри ёзишича, Володимир Зеленский ва Доналд Трамп ўртасидаги муносабатлар 2025 йил бошида Овал кабинетда рўй берган можародан бери «энг паст нуқтада» турибди. Нашр Доналд Трампнинг 10 октябр куни берган баёнотларидан сўнг шундай хулосага келган. Журналистлар билан суҳбатда у Украина президентини алмаштириши кераклигини айтди:
Биласизми, нима таклиф қиламан? Мен уларга [украинларга] келишувлар туза оладиган янги етакчи топишни таклиф қиламан – ахир у [Володимир Зеленский] кўплаб битимлар тузиши мумкин эди, бироқ негадир буни ҳеч қачон қилмади. <…> Назаримда, Украинага янги президентни сайлаш вақти келди.
Axios ҳам вазиятни «жиддий инқироз» деб атамоқда. WSJ нашри ёзишича, АҚШ президентининг сўнгги сўзлари Европанинг ўтган бир ярим йил ичида эришган келишувларига зарар етказиши мумкин. Бу вақт мобайнида Европа Трампни Американинг Украинани қўллаб-қувватловини сақлаб қолиш, шунингдек, Россияга босим ўтказишда давом этиш тўғри йўл эканига ишонтиришга ҳаракат қилганди.
Трампнинг бу шов-шувли баёноти у Владимир Путин билан Россия дизел ёқилғисини Америка ва жаҳон бозорига етказиб бериш бўйича келишиб олганидан кейин янгради. Журналистлар билан мулоқотда Трамп АҚШ Зеленскийни у «Россия билан истаганини қилиши мумкинлиги», аммо нефтни қайта ишлаш заводларига зарба бермаслиги кераклиги, чунки бу «глобал муаммо» эканини айтган. «У эса нима қиляпти? Бориб, дизел билан боғлиқ объектларга зарба беряпти. У буни бас қилиши керак», – деди Трамп. Axios маълумотига кўра, АҚШ президенти бунгача Украинадан Россия нефтни қайта ишлаш заводларига ҳужумларни тўхтатишни талаб қилган – Трампнинг фикрича, бундай ҳужумлар АҚШда ёқилғи нархи ошишига олиб келмоқда.
АҚШ Молия вазирлиги аллақачон Россияга 2027 йил 27 апрелгача амал қилувчи лицензияни тақдим этди, бу АҚШ санкцияларига қарамай, Россия дизел ёқилғисини жаҳон бозорига олиб чиқишга имкон беради. Володимир Зеленский бу қарорни «очиқ-ойдин заифлик» деб баҳолади: Путинга қилинаётган совғалар тинчлик учун ҳам, цивилизациялашган дунё учун фойда келтирмайди. Россия дизел учун келгусида террор ва пасткашликлари билан „раҳмат айтади“. Россияга нефт маҳсулотларини сотишга рухсат бериш – якунланиши керак бўлган урушни узайтиришга, унга инвестиция киритишга тенгдир. Россия билан бир томонлама эмас, балки ўзаро тенг шартлардаги реал деэскалация керак.
АҚШ президентининг Украинага янги етакчи кераклиги ҳақидаги сўзлари Киевдагиларни «шокка туширди ва эсанкиратиб қўйди», дея ёзади X ижтимоий тармоғида Bild, Welt ва Politico нашрлари учун ишловчи журналист Паул Ронцҳаймер. Зеленскийнинг яқин маслаҳатчиси унга шундай деган: «Биз [АҚШ Конгрессига] оралиқ сайловлар олдидан сайловолди кампанияси давомида яна эътибор марказида бўлишимиз мумкинлигини тушунардик. Лекин бунақасини кутмагандик».
