АҚШ Конгресси Вакиллар палатаси юридик қўмитасидаги демократлар 26 октябр куни 53 саҳифали ҳисобот эълон қилди, унга кўра беш нафар аёл президент Доналд Трампни зўрлаш ёки жинсий зўравонликда айблаган.
Miami Herald хабарига кўра, ҳисоботда Трампга нисбатан камида битта янги айблов келтирилган. Собиқ «Швейцария гўзали» Беатрис Койлнинг таъкидлашича, 1993 йилда Ню-Йоркдаги гўзаллик танлови пайтида Трамп уни Plaza меҳмонхонасида зўрлаган. Шундан сўнг аёлнинг танасида қонталаш ва кўкаришлар қолган.
Ҳисоботда жами 11 нафар аёл тилга олинган. Уларнинг беш нафари газеталарга берган интервюлари, суд даъволари ёки бевосита қўмита вакиллари билан суҳбатларда Трамп томонидан зўрлаш ёхуд жинсий зўравонлик содир этилганини маълум қилган. Яна уч нафар аёл ФҚБ ходимларига Эпштейн иштирокида Трамп билан бўлган учрашувлари ҳақида сўзлаб берган. Қолган уч нафари эса жамоатчиликка очиқ баёнот бермаган, ҳисоботда уларнинг кўрсатмалари ўрнига Эпштейн иши материалларидан фойдаланилган. Эҳтимолий воқеаларнинг аксарияти 1990 йилларда содир бўлган.
Ҳисобот Конгрессга бўлиб ўтадиган оралиқ сайловларга атиги 9 кун қолганида эълон қилинди, деб таъкидлайди Miami Herald. Муаллифлар президентга нисбатан жиноий тергов ўтказишга ва махсус прокурор тайинлашга чақирмоқда.
Оқ уйдагилар ҳисоботни сиёсий мақсадларда уюштирилган деб атади. Трамп Эпштейн билан боғлиқ жиноятларга ҳар қандай алоқадорлигини рад этмоқда ва бу можарони «сохталаштириш» деб атамоқда.
Январ ойида Адлия вазирлиги Трампга қўйилган шундай айбловларни рад этган эди: «Аниқлик киритиш учун айтамизки, бу айбловлар асоссиз ва ёлғондир. Агар уларда заррача ҳақиқат бўлганида эди, улардан аллақачон президент Трампга қарши фойдаланишган бўларди».
