DW хабарига кўра, Новак ушбу рақамларни 12 октябр куни «Вести» теледастурида келтирган.

Россия Энергетика вазирлиги маълумотларига кўра, 2026 йилнинг дастлабки тўққиз ойида Европага 21,3 миллиард долларлик, яъни 19,1 миллиард евролик энергия ресурслари етказиб берилган.

Шу билан бирга, Новак Россия энергия экспортининг асосий қисми ҳозир Осиё-Тинч океани минтақаси мамлакатларига йўналтирилганини айтган. Унинг сўзларига кўра, Россия дизел ёнилғиси экспортини ойига 3,5 миллион тоннагача ошириш имкониятига эга.

Россия Украинага кенг кўламли ҳужум бошлаганидан сўнг ЕИ Россия энергетика секторига қарши қатор санкциялар жорий этган ва унинг энергия ресурсларидан тўлиқ воз кечиш йўлини танлаган.

Бироқ AFP агентлиги қайд этишича, ЕИнинг айрим давлатлари, жумладан, Франция Россиядан энергия ресурслари, хусусан, суюлтирилган табиий газ харид қилишда давом этмоқда. Словакия ва Венгрия эса санкциялардаги истиснолар асосида қувур орқали етказиладиган Россия нефтини сотиб олмоқда.

Хабарда келтирилишича, ҳисоб-китобларга Россия нефт ва газининг Ҳиндистон ёки Туркия каби учинчи мамлакатларда қайта ишланиб, кейин Европага етказилган қисми киритилмаган. Ушбу давлатлар, шунингдек, Хитой Россиядан хом нефт харидини сезиларли оширган.

11 октябр куни АҚШ молия вазири Скотт Бессент европаликларни «иккиюзламачилик»да айблаган. У Европа Россиядан энергия ресурсларини сотиб олиш орқали Владимир Путинни молиялаштиришда давом этаётганини даъво қилган.

Бу баёнотлар АҚШ ва Россия ўртасида дизел ёнилғиси етказиб бериш бўйича эълон қилинган келишув фонида янграган.

Доналд Трамп 9 октябр куни Владимир Путин билан телефон мулоқотидан сўнг Россия дизелини «Америка ва жаҳон бозорига» етказиб беришга келишилганини билдирган.

Трампнинг баёнотига кўра, Россия компаниялари дастлаб 300 минг тоннадан ортиқ, ноябрда яна 500 минг тонна, шундан сўнг эса 1 миллион тонна дизел жўнатиши керак. Кейинчалик нефтни қайта ишлаш заводларининг ҳолатидан келиб чиқиб, яна 3 миллион тонна етказиб бериш тилга олинган, аммо бу ҳажм учун аниқ муддат кўрсатилмаган.

Хабарга кўра, АҚШ Молия вазирлиги Россия дизелига нисбатан Америка санкцияларини 2027 йил апрелигача вақтинча тўхтатувчи бош лицензия чиқарган.