Голф-клубдаги сиёсат
Трамп Путин билан дизел бўйича келишаётган бир вақтда АҚШ, Украина ва Европа вакиллари учрашув ўтказаётган бўлган. Украинлар ўз таклифини, европаликлар ўз таклифини илгари сурган, шунда бутун бошли Америка номидан гапириш ваколатига эга бўлган Уиткофф «Шошмай туринг, жаноблар, мен ҳозир келаман», деб хонадан чиқиб кетиб, топинг-чи қаерга борган? Путин нима деётганини эшитиш учун унинг Трамп билан суҳбатига учинчи одам бўлиб қўшилган!
Бутун инсоният ҳаётига таъсир қиладиган масала муҳокамаси бирор расмий идорада эмас, маҳаллий ҳокимлик биносида ҳам эмас, Майамидаги хусусий голф-клубда ўтказилган. Ишониш қийин, лекин дунёдаги энг қудратли давлат АҚШнинг дипломатияси ҳозир ана шундай кўринишда.
«Разведкадаги манбаларидан» инсайд хабарлар улашишни яхши кўрадиган New York Times газетасининг ёзишича, жума куни Майамидаги мистер Уиткоффга тегишли голф-клубда АҚШ, Украина ва Европа вакиллари иштирокида учрашув ўтказилган. АҚШ номидан табиийки, Трампнинг дўсти Уиткофф ва яҳудий куёви Кушнер иштирок этган. Европа номидан Олмония, Франция ва Британия лидерларининг миллий хавфсизлик бўйича маслаҳатчилари, шунингдек, Европа Иттифоқи ва НАТОдан ҳам юқори мартабали мулозимлар бўлган.
Учрашув давомида украиналиклар урушни тугатиш бўйича ўз таклифларини билдирган, европаликлар ҳам тайёрлаб борган режасини айтган. Ва шу пайт мистер Уиткофф меҳмонлардан узр сўраб хонани тарк этган. Суҳбат 6 соатга чўзилган, Уиткофф 70 га киряпти, қаерга кетгани аниқ-ку, дейишга шошилманг, гап сиз ўйлаган танаффус ҳақида эмас. Музокарачилар раҳбари Россия президенти Путин нима дейишини эшитиш учун унинг Трамп билан суҳбатига учинчи одам бўлиб қўшилган.
NYT берган хабардан Трамп ҳам голф-клубда бўлган деб ўйлаш мумкин, лекин аслида бундай бўлмаган. Уиткоффни Майамидан туриб Оқ уйдаги Трамп ва Кремлдаги Путин ўртасидаги суҳбатга онлайн улашган. Зўр а, дунёдаги икки қудратли кабинетдан туриб ўтказилаётган суҳбатга Майамидаги голф клубдан учинчи одамни конференция қилиб қўшишган. Худди ўн йиллар аввал мобил алоқа энди ривожланаётганда синфдошлар суҳбатига бир-бирларини қўшгани каби.
Путин ва Трамп бир футбол ўйини вақти давомида гаплашган. Америка «Зеленскийнинг додини бериш учун» Россиядан дизел сотиб олиши бўйича келишган. Уиткофф буларнинг барчасини эшитиб, бояги хонага қайтган ва «Жаноблар, мана шундай келишув бўлди, Россиядан санкциялар олиб ташланди, биз энди улардан «солярка» оламиз», деган. Украина делегацияси бу гапни эшитганда қандай аҳволга тушганини тасаввур қилаверинг.
Уиткофф Трампнинг Россия нефт заводларига зарба беришни тўхтатиш бўйича талабини етказган. Хонадаги украинлардан бири «Эвазига нима бўлади?» деб қизиқиб сўраган. Уиткофф акс ҳолда разведка маълумотлари берилиши тўхташини айтган. Шундай ҳам бўлди. Россиянинг Киев бўйлаб охирги зарбалари чоғида Америка томони разведка маълумотлари билан бўлишмаган. Балки шу сабаб кутилганидан кўпроқ ракеталар нишонга бориб урилган.
