Унга видеокузатув камералари, ақлли эшик қўнғироғи, электрон қулф, термостат ва ҳарорат датчиклари киритилган. Барча қурилмаларни iPhone орқали созлаш ҳамда «Уй» (Home) иловаси ёки Siri ёрдамида бошқариш мумкин.
Home Collection’нинг асосий ғояси — ақлли уйни янада содда ва қулай қилишдан иборат. Барча аксессуарлар ягона минималистик услубда ишланган бўлиб, барқарор алоқа учун Thread технологиясини қўллаб-қувватлайди ҳамда алоҳида ҳам, ўзаро биргаликда ҳам ишлай олади. Масалан, уйдан охирги одам чиқиб кетганда, тизим автоматик равишда эшикни қулфлайди, камераларни ёқади ва ҳароратни ўзгартиради. Уй эгаси қайтиши олдидан эса хонани тайёрлаб, у яқинлашганда қулфни очади.
«Apple Home Collection ақлли уй учун аксессуарларни хотиржамлик билан танлаш имконини беради. Соҳа етакчилари бўлмиш LG Electronics ва Schneider Electric билан яқин ҳамкорликда ҳар бир қурилмани Apple Home билан бенуқсон ишлайдиган қилиб яратдик, бу эса уйни содда, ишончли ва махфий бошқаришни таъминлайди», — деди Apple компаниясининг аппарат таъминотини ишлаб чиқиш бўйича вице-президенти Мэтю Костелло.
Видеокузатув тизими учун LG масъул бўлди. Компания 2,5К тасвир аниқлигига эга тўртта қурилма ишлаб чиқди. Улар одамларни, уй ҳайвонларини, автомобилларни ва жўнатмаларни таний олади. Ҳодиса ёзувлари iCloud+ хизматида 10 кун давомида сақланади, камералар учун алоҳида булутли обуна талаб этилмайди. Тегишли тариф режаси мавжуд бўлса, Apple Intelligence видеодаги ҳодисаларни матн кўринишида автоматик тавсифлаб беради ва оддий матнли сўровлар орқали керакли лавҳаларни топиш имконини тақдим этади.
Мазкур туркумдан меҳмонлар ва жўнатмаларни кузатиш учун иккита камерага эга LG Video Doorbell видеоқўнғироғи, ҳаракат аниқланганда автоматик ёнадиган иккита прожекторли ташқи Floodlight Cam, шунингдек, рангли тунги тасвирга олувчи ихчам Outdoor Cam ўрин олган. Indoor Cam эса алоҳида эътиборга лойиқ: хонадон аъзоларидан бири уйга қайтганида унинг объективи хонани кузатиш учун автоматик кўтарилиши ва тасвирга олишни тўхтатиб, пастга тушиши мумкин. Шунингдек, камералар Wi-Fi узилиб қолган тақдирда ҳам ёзишда давом этишга имкон берувчи ички хотира билан таъминланган.
Яна бир янгилик — LG Smart Deadbolt Lock электрон қулфи. Ultra Wideband технологияси шарофати билан у эгасининг яқинлашаётганини сезади ва унда рақамли калит ўрнатилган мос iPhone ёки Apple Watch бўлса, эшикни автоматик равишда очади. Шунингдек, смартфон ёки соатни теккизиб очиш, PIN-код киритиш ва оддий калит учун мўлжалланган яширин туйнук ҳам кўзда тутилган. Қулф эшик очилишини ва бузишга бўлган уринишларни қайд этиб боради, меҳмонларга эса «Уй» иловаси орқали вақтинчалик кириш ҳуқуқини тақдим этиш мумкин.
