Янги BMW i3 50L электр седани Хитойдаги йўл синовлари давомида қайта қувватланмасдан 1213 км масофани босиб ўтди. Бу ҳақда Car News China нашри хабар берди.
Автомобил белгиланган манзилга аккумуляторнинг 1 фоиз қолдиқ қуввати билан етиб келди. Босиб ўтилган масофа эълон қилинган юриш захирасининг 118 фоизини ташкил этди, бу эса бренднинг узоқ масофага юриш синовларидаги янги рекордига айланди.
Синов вақтида ўртача электр энергияси сарфи 100 км учун атиги 8,8 кВт·соатни ташкил этди. Шу билан бирга, йўналиш автомагистраллар, оддий йўллар ва шаҳар кўчаларини ўз ичига олган эди.
BMW i3 50L янги Neue Klasse электр платформаси негизида яратилган. Синовдан ўтказилган седан 113,4 кВт·соат сиғимли аккумулятор ва 800 волтли архитектура билан жиҳозланган. BMW i3 50L моделини серияли ишлаб чиқариш ва Хитой бозорига олиб чиқиш 2026 йил тўртинчи чорагига режалаштирилган.
Синовлар BMW компаниясининг Хитойнинг Шенян шаҳридаги заводида олтинчи авлод аккумуляторларини серияли ишлаб чиқариш бошланиши муносабати билан ўтказилди.
