Ўзгаришлар Кичик ҳалқа йўлининг Олмазор туманидаги Беруний кўчаси билан кесишмасидан — «Орзу» чорраҳасидан Мирзо Улуғбек туманидаги Катта Дархон кўчаси билан кесишмасигача — «Палов музейи» яқинигача бўлган қисмида амалга оширилган.
Марказ мутахассислари транспорт оқими ва чорраҳаларнинг хусусиятларини ўрганиб, светофор сигналларининг алмашиниш кетма-кетлиги ҳамда давомийлигини қайта созлаган.
Мақсад автомобилларнинг чорраҳаларда ортиқча тўхташини ва кутиш вақтини камайтириш, транспорт оқимининг бир маромда ҳаракатланишига шароит яратишдан иборат.
Марказ келтирган ўлчов натижаларига кўра, ушбу масофада бир марталик қатнов учун сарфланадиган вақт 6 дақиқага ёки қарийб 23 фоизга қисқарган.
Дастлабки ўлчов 25 сентябр куни соат 12:00 да, светофорлар қайта созланганидан кейинги ўлчов эса 8 октябр куни соат 12:40 да ўтказилган.
Марказ бу натижалар транспорт оқими нисбатан кам бўлган вақтга тегишли эканини таъкидлаган. Тиғиз соатларда йўлни босиб ўтиш вақти автомобиллар оқими ва амалдаги вазиятга қараб фарқ қилиши мумкин.
