Бухоролик тадбиркорга нисбатан товламачилик жиноятини содир қилган шахс жиноий жазога тортилди. Kun.uz суд ҳужжати билан танишди.
Суд ҳукмига кўра, Тошкент шаҳрида яшовчи 72 ёшли Ҳ.Ю. Бухоро шаҳридаги МЧЖлардан бирининг раҳбарига ўзини “Президент администрацияси масъул ходими” сифатида таништирган.
Ҳ.Ю. тадбиркорга администрация томонидан y раҳбарлик қилаётган жамият фаолияти бўйича текшириш ўтказиш топшириғи берилганини, жамиятга ажратилган кредит маблағлари мақсадсиз сарфлангани юзасидан маълумотлар борлигини айтиб, қўрқитган. Текшириш якунида барча мол-мулкларидан маҳрум бўлиши мумкинлигини билдирган.
Сўнгра ишни “ёпди-ёпди” қилишини айтиб, тадбиркордан 500 минг доллар сўраган. “Хамир учидан патир” сифатида банк картасига 10 млн сўм ўтказдириб олган вақтида тезкор тадбирда ушланган.
Ҳ.Ю. судда айбига иқрорлик билдирмаган ва тадбиркордан ярим млн доллар талаб қилмаганини маълум қилган.
“2025 йил октябр ойида ижтимоий тармоқлар орқали бир МЧЖ раҳбарининг телефон рақамини топиб олдим. Сўнг ушбу жамият бош ҳисобчиси Э.нинг ҳам телефон рақамини топиб, унга қўнғироқ қилдим ва Президент администрациясида ишлашимни, жамият раҳбари менга қўнғироқ қилишини айтдим.
Шу куни жамият раҳбари менга қўнғироқ қилди. Унга администрацияда ишлашимни, жамият устидан шикоят тушганини, шу сабабли ўзим Бухорога бориб, учрашишимни билдирдим.
2 кундан сўнг Бухоро шаҳрига бордим. Когондаги темир йўл бекатида мени МЧЖ раҳбари кутиб олди. У билан Бухоро шаҳридаги офисига бордик. Суҳбат давомида уларга МЧЖ фаолияти бўйича администрацияга мурожаат келиб тушганини, 40 млн доллар кредит олиб, текширув давомида йўқ нарсани кўрсатганини, завод ҳозирги кунда фаолият юритмаётганини айтдим ҳамда ҳужжатлардаги камчиликларни тўғрилаб қўйишларини билдирдим.
Шу вақтда ёнимга жамият бош ҳисобчиси ва юристи келди. Улар мендан Президент администрацияси масъул ходимлигимни тасдиқлайдиган ҳужжат сўрашди. Шундан сўнг МЧЖ раҳбари шахсимга оид маълумотларни ёзиб олди ва темир йўл вокзалига олиб бориб қўйди”, деган Ҳ.Ю. суддаги кўрсатмасида.
Шу тариқа, Ҳ.Ю. Тошкент шаҳрига қайтиб келган. Бир неча кундан сўнг унга МЧЖ раҳбари қўнғироқ қилган.
“Тадбиркорга ҳужжатларидаги камчиликларни тўғрилаб қўйишни айтдим. У камчиликлар ҳаммада бўлишини билдириб, ёрдам сўради. 2025 йил 4 ноябр куни Тошкент шаҳрида кафеда кўришдик. Мен унга аризани тинчитиш учун ёрдам беришимни айтдим.
