Пайариқ туманида бир гуруҳ шахслар томонидан калтакланган эркак бир ой комада ётиб, вафот этди. Бу ҳақда Millar хабар берди.
Маълум қилинишича, туманнинг Наврўз маҳалласида яшаган 32 ёшли эркак таниши билан ошхонадан чиқиб, уйига кетаётганида Spark машинасида келган бир гуруҳ шахслар унга ҳужум қилиб, бошига арматура билан ура бошлаган.
Воқеа гувоҳи ўртоғини ҳимоя қилишга ва ҳужум қилганларнинг қўлидаги арматурани олиб қўйишга уринганини, шу пайт унга ҳам ташланиб, тошлар билан уришганини айтган.
“Шербек билан ошхонадан чиқиб келаётган эдик. Йўлда уйимиз томонга бурилганимизда оқ Spark йўлимизни тўсиб тўхтади. Машинадан қўлларида арматура билан тушиб, гуруҳ бўлиб Шербекнинг бошига ура бошлашди. Буни кўриб, машинадан югуриб тушдим-да, уларнинг қўлидаги арматурани олишга ҳаракат қилдим. Шу пайт улар мени ҳам ура кетди. Катта-катта тошлар билан ура бошлашди. Қараганимда, Шербек асфалт устида, футболкасиз, қонга беланиб ётган эди. Уни тепиб уришаётган эди. Симтўрдан сакраб ўтганимда Шербекни машинага мажбурлаб тиқишаётган эди”, деган марҳумнинг дўсти.
Марҳумнинг акаси укасини маҳалла марказидан тахминан 3 км узоқликдаги, аҳоли яшамайдиган ҳудудга олиб кетишганини билдирган. У ўша ердан оғир аҳволда топилган.
“Биринчи кўрганимда укамни ўлиб қолган деб ўйладим. Атрофида бетон бўлаклари ва сим бор эди. Бўғилгани кўриниб турарди, бўйнидан юқори қисми кўкариб кетганди. Ўпкасидан қандайдир овоз эшитганимдан кейин умидим уйғонди. Кейин уни машинага ортиб олиб кетдим”, деган марҳумнинг акаси.
Унинг таъкидлашича, укасининг бошига кўп марта зарба берилган, пешанаси ва бошининг ён қисмлари шишиб кетган.
“Уриб, шунчаки тан жароҳати етказиб ташлаб кетишмаган. Катта йўл ёқасида қолдиришганида кимдир унга ёрдам бериши мумкин эди. Овлоқ жойга олиб бориб кўмишган. Кўмилганида ҳаво етмай, ўрнидан турган. Шунда яна сим билан бўғиб, бошига арматура ва бетон билан уришган”, деган ака.
Марҳумнинг турмуш ўртоғига кўра, таниб бўлмас даражада жароҳатланган эри 28 кун комада ётган.
Жанжалга нима сабаб бўлгани ҳозирча маълум эмас.
