Electrek хабарига кўра, DeLorean дастлаб чемпионатнинг бошқа иштирокчилари каби стандарт Airspeeder Mk3C шассисидан фойдаланади. Лойиҳа оддий йўл ҳаракати учун мўлжалланган автомобил эмас, ҳаво пойгаларида қатнашадиган eVTOL — тик учиб-қўнадиган электр аппаратидир.
Airspeeder асосчиси ва раҳбари Мэтт Пирсон бренднинг кино тарихидаги ўрнига эътибор қаратган. Унинг таъкидлашича, ҳақиқий учувчи автомобил яратилишидан анча олдин дунё томошабинлари учувчи DeLorean қандай кўринишини тасаввур қилиб бўлган.
Кейинги босқичда компания ўз пойга аппаратини ишлаб чиқишни режалаштирмоқда. Хабарда айтилишича, 2027–2028 йилги мавсумда Берклидаги Калифорния университети ва Жоржия технология институтининг талаба муҳандислар жамоалари билан ҳамкорлик қилиш кўзда тутилган.
DeLorean зангламас пўлат кузовли ва «чайка қаноти» услубида очиладиган эшикларга эга спорт автомобиллари билан танилган. Энди бренд шу образни электр авиацияси ва ҳаво пойгалари билан боғлашга уринмоқда.
Ҳозирча лойиҳанинг оммавий ишлаб чиқариладиган учувчи автомобилга айланиши ҳақида маълумот йўқ. Тақдим этилган режалар асосан пойгада иштирок этиш ва янги аппаратни ишлаб чиқишга қаратилган.
