DW хабарига кўра, Трамп бу ҳақда 18 октябр куни Truth Social ижтимоий тармоғида ёзган. Исроил парламенти — Кнессетга сайловлар 27 октябрга белгиланган.
АҚШ президенти Нетаняҳуни қўллашини Эронга қарши ҳамкорлик билан боғлаган. Унинг айтишича, Исроилга бошқа раҳбар келса, Вашингтон Эронга мустақил қарши туришига тўғри келади. Трамп бундай йўл тутиш нияти йўқлигини таъкидлаган.
Шунингдек, у Нетаняҳу ҳукумати билан биргаликда Эрон режимига ҳарбий ва молиявий жиҳатдан зарба берилаётганини даъво қилган. Теҳрон ўз сиёсатини ўзгартирмаса, босим давом этишини билдирган.
The Jerusalem Post келтирган сўров натижаларига кўра, «Ликуд» сайловда 19 та, Исроил армиясининг собиқ бош қўмондони Гади Айзенкотнинг «Яшар» партияси эса 22 та мандат олиши мумкин. Бироқ ҳукумат тарафдорлари ва мухолифат блокларининг умумий имкониятлари бир-бирига яқинлигича қолмоқда.
Кнессетда кўпчиликни шакллантириш учун 120 ўриндан камида 61 тасини бирлаштириш зарур. Шу боис алоҳида партиянинг биринчи ўринни эгаллаши унинг ҳукумат тузишини автоматик равишда таъминламайди.
AP агентлигига кўра, эҳтимолий сценарийлардан бири — мухолифатнинг сўл, марказчи ва ўнг партияларни бир коалицияга бирлаштиришга уриниши. Иккинчи вариант эса Нетаняҳу партиясининг ўта ўнг сиёсий кучлар билан иттифоқини давом эттиришидир.
Бундай шароитда араб партиялари муҳим ўрин тутиши мумкин. Улар манфаатларини ифодалайдиган араб аҳоли мамлакатда овоз бериш ҳуқуқига эга фуқароларнинг тахминан 20 фоизини ташкил этади. Сўровларда араб партияларига 13–15 та мандат прогноз қилинмоқда.
Бироқ сиёсий кучлар ўртасидаги келишмовчиликлар коалиция тузишни қийинлаштириши мумкин. AP баҳосига кўра, ҳеч бир томон парламент кўпчилигини шакллантира олмаса, Исроилда сиёсий инқироз чўзилиши ва яна сайлов ўтказилиши эҳтимоли бор.
