Visual Capitalist инфографикаси Lloyd’s List’нинг 2026 йилги рейтингига асосланган. Ундаги ўринлар 2025 йилдаги контейнер айланмаси бўйича белгиланган.
Ҳажмлар TEU — 20 футлик, яъни тахминан 6,1 метр узунликдаги стандарт контейнерга тенг шартли бирликда ҳисобланган. Статистикага юк ортилган контейнерлар ҳам, бўш контейнерлар ҳам киритилган.
Шанҳай портининг контейнер айланмаси АҚШнинг энг йирик контейнер порти — Лос-Анжелес кўрсаткичидан беш баробардан зиёд бўлган.
Рейтингдаги 30 портнинг жами контейнер айланмаси қарийб ярми Хитой портлари ҳиссасига тўғри келган. Бу ҳисобга 13 миллион TEU кўрсаткичга эга Ҳонконг ҳам киритилган.
Шанҳайнинг устунлиги нимада?
Шанҳай порти фақат шаҳарнинг ўзига хизмат қилмайди. Ички сув йўллари ва темирйўллар уни Янцзи дарёси бўйидаги саноат марказлари билан боғлайди. Шу орқали Хитойнинг марказий ва шарқий ҳудудларидаги ишлаб чиқарувчилар маҳсулотларини хорижий бозорларга чиқаради.
Ишлаб чиқаришнинг Осиёдаги бошқа мамлакатларга ҳам кенгайиши ва Хитойнинг Жануби-шарқий Осиё билан савдо алоқалари мустаҳкамланиши минтақавий юк ташиш тармоқларини ривожлантирмоқда. Бу жараёнда Хитой портлари муҳим ўринни сақлаб қоляпти.
Сингапур — юклар учун «транзит аэропорт»
Сингапурнинг порт модели эса кўпроқ халқаро денгиз йўналишларини бир-бирига боғлашга асосланган. У дунёдаги 600 дан ортиқ порт билан алоқа қилади.
Бу ерда контейнерлар бир кемадан бошқасига ўтказилиб, кейин манзили сари йўл олади. Шу жиҳатдан Сингапурни йўловчилар бошқа рейсга ўтадиган транзит аэропортга қиёслаш мумкин. Юкларни қайта ортишга асосланган бу тизим кичик шаҳар-давлатнинг дунёда иккинчи ўринга чиқишига ёрдам берган.
Чуқур сувли причаллар ва автоматлаштирилган электр кранлари янги терминалларга энг йирик контейнер ташувчи кемаларни қабул қилиш имконини беради.
Сингапур Туас портини қуриш орқали қувватларини яна кенгайтирмоқда. Лойиҳа контейнер операцияларини бир жойга жамлашни кўзда тутади. Уни 2040-йилларда тўлиқ якунлаш режалаштирилган бўлиб, шундан сўнг портнинг йиллик ўтказиш қуввати 65 миллион TEU'га етиши кутилмоқда.
