Конго Демократик Республикаси Миллий соғлиқни сақлаш институти 16 август куни кечқурун эълон қилган маълумотларга кўра, Эболанинг ҳозирги авж олиши оқибатида ҳалок бўлганлар сони мамлакатда аввал кузатилган барча эпидемиялар кўрсаткичидан ошиб кетган.
Ҳозирга қадар 4945 кишида вирус юқтиргани лаборатория орқали тасдиқланган, 2325 бемор эса вафот этган.
Бу 2018–2020 йилларда Конгода кузатилган Эбола эпидемияси кўрсаткичларидан ҳам юқори. Ўша пайтда мамлакатда қарийб 3500 та касалланиш ҳолати қайд этилган ва салкам 2300 киши вафот этган эди.
Эбола тарихида ҳозирги Конго эпидемиясидан ҳам йирикроқ авж олиш 2014–2016 йилларда Ғарбий Африкада кузатилган. Гвинея, Либерия ва Серра-Леонеда жами 28 616 киши касалланган ва 11 310 киши вафот этган.
Вирус жуда тез тарқалмоқда
Ҳозирги эпидемиянинг энг хавотирли жиҳатларидан бири — вирус тарқалишининг юқори суръати.
Reuters маълумотларига кўра, 2014–2016 йиллардаги Ғарбий Африка эпидемиясида қурбонлар сони 1000 нафарга етиши учун тахминан беш ой вақт кетган. Конгодаги ҳозирги авж олишда эса уч ойдан ҳам кам вақт ичида 2 мингдан ортиқ киши вафот этган.
Конго ҳукумати маълумотларига кўра, июн ойи бошида касалланганлар орасида ўлим даражаси тахминан 20 фоизни ташкил қилган бўлса, ҳозир бу кўрсаткич 46 фоизгача кўтарилган.
Мутахассисларнинг фикрича, бундай ўсиш вируснинг ўзи янада хавфли бўлиб қолганини англатмаслиги мумкин. Аксинча, бу мамлакатда инфекция тарқалишини кузатиб бориш тизимидаги камчиликлар ҳамда беморларнинг тиббий хизматлардан ўз вақтида фойдалана олмаслиги билан боғлиқ бўлиши мумкин.
Ҳозирги вариантга қарши тасдиқланган вакцина йўқ
Конгодаги ҳозирги Эбола авж олиши мамлакатда қайд этилган 17-эпидемия ҳисобланади.
Бу сафар касалликка Эбола вирусининг нисбатан кам учрайдиган Bundibugyo (Бундибуджио) варианти сабаб бўлмоқда. Манбага кўра, ушбу вариантга қарши ҳозирча тасдиқланган вакцина ҳамда махсус даволаш усули мавжуд эмас.
Эбола вируси инфекцияланган одамнинг қони ёки бошқа биологик суюқликлари билан бевосита алоқа орқали юқиши мумкин. Вирус оғир геморрагик иситмани келтириб чиқаради ва айрим ҳолатларда ўлимга олиб келади.
Сўнгги 50 йил давомида Африкада Эбола билан боғлиқ эпидемиялар оқибатида жами 15 мингдан ортиқ киши ҳаётдан кўз юмган.
Ҳозирги вазиятда мутахассислар Конгода касалликни эрта аниқлаш, инфекция тарқалишини назорат қилиш ва аҳолининг тиббий хизматлардан фойдаланиш имкониятини кенгайтириш муҳимлигини таъкидламоқда.
