Ихчам планшет илк бор Super Retina XDR OLED-экрани билан жиҳозланди. Рамканинг қисқариши ҳисобига дисплей диагонали 8,3 дюймдан 8,5 дюймгача катталашди. У янада тўйинган қора ранг, юқори контраст ва 1200 нитгача бўлган максимал ёрқинликни таъминлайди — бу аввалги моделга қараганда икки баробар кўпдир.
Apple ёруғлик кучли бўлганда шуълаларни камайтирадиган нанотекстурали қопламага эга версияни ҳам кўзда тутган. Экраннинг минимал ёрқинлиги атиги 1 нитни ташкил этади, бу эса қоронғида планшетдан фойдаланишни янада қулайлаштириши керак. Шу билан бирга, экраннинг янгиланиш частотаси ўзгаришсиз — 60 Гц даражасида қолди.
iPad Mini корпуси янада юпқалашиб, атиги 5,4 мм ни ташкил этди. Шунингдек, планшет IP67 стандарти бўйича сув ва чангдан ҳимояга эга бўлди, илгари ҳеч бир iPad бундай кўрсаткич билан мақтана олмас эди. Бунга «акустик дисплей» — динамикларнинг экран ичига ўрнатилиши эвазига эришилди.
Планшет асосини 2 нанометрли технологик жараён бўйича ишлаб чиқарилган янги A20 Pro процессори ташкил этади — худди шундай чип iPhone 18 Pro‘га ҳам ўрнатилган. Apple маълумотларига кўра, у график вазифалар ва сунъий интеллект билан ишлашда самарадорликнинг сезиларли даражада ошишини таъминлайди. Планшет iPadOS 27 бошқаруви остида ишлайди ҳамда Apple Intelligence ва Siri’ни қўллаб-қувватлайди.
Шунингдек, Apple 12 мегапикселли Center Stage олд камерасини корпуснинг узун томонига кўчирди. Бундай жойлашув горизонтал ҳолатдаги видеоқўнғироқлар ва конференциялар учун анча қулайдир. Бундан ташқари, планшет суратга олиш ва ҳужжатларни сканерлаш сифатини яхшилайдиган мослашувчан True Tone чақноғига эга бўлди.
Олдиндан буюртмалар 28 октябрдан қабул қилинади, сотувлар эса 6 ноябрдан бошланади. Қурилма уч хил хотира ҳажмида тақдим этилади: 128, 256 ва 512 ГБ. Техник хусусиятлар билан бирга нарх ҳам ошди: iPad Mini 699 доллар туради. Нанотекстурали қопламага эга версия қимматроқ бўлиб, унинг нархи 849 доллардан бошланади. Аввалги авлоддан фарқли ўлароқ, ранглар атиги иккита: тилларанг ва кулранг.
