Украинанинг Херсон области Олешки шаҳрида 27 октябр куни эрта тонгдан сукунат режими бошланди. Ундан олдинроқ Россия ва Украина РФ томонидан ишғол этилган ва гуманитар фалокат юзага келган ушбу шаҳарга инсонпарварлик ёрдами етказиш ҳамда тинч аҳоли эвакуациясини ташкил этиш учун ўт очишни тўхтатиш бўйича келишиб олганди. Бу борадаги келишувга АҚШнинг биринчи хоними Мелания Трамп ёрдамида эришилган.
«Слуга народа» партиясининг Украина Олий радасидаги фракцияси раҳбари ва Украина музокарачилари гуруҳи аъзоси Давид Арахамиянинг маълумотига кўра, сукунат режими 1 ноябр куни соат 22:59 га қадар давом этиши керак. Буни Россиядаги инсон ҳуқуқлари бўйича вакил Яна Лантратова ҳам тасдиқлади. Арахамия Олешкидаги сукунат режимини «2022 йилдан буён энг катта деэскалация» деб атаган.
Мелания Трамп эса сукунат режими режадагидан икки кун олдинроқ жорий этилгани ва унинг географияси гуманитар конвойларнинг хавфсиз ўтишини таъминлаш учун кенгайтирилганини айтди. Унинг сўзларига кўра, буни Россия бош штаби бошлиғи Валерий Герасимов ҳам тасдиқлаган.
27 октябр куни кечқурун Украина ва Россия ўт очишни тўхтатиш режимига икки томон ҳам амал қилаётганини хабар қилди. Кремлдагилар Олешкидаги гуманитар операция «режа бўйича кетаётгани»ни қайд этди.
Гуманитар операциянинг кўплаб тафсилотлари аниқ эмас: қайси йўллар миналардан тозаланиши, шаҳар аҳолиси қаерга ва қандай олиб чиқилиши, уларга тўғридан тўғри Украинага кетишга рухсат берилиши ёки Олешкида қолиши, оилаларга болалари билан кетишга рухсат берилиши номаълум. Financial Times нашри маълумотига кўра, Украинага кетишни истаганлар аввал Россия назорати остидаги ҳудудга олиб ўтилади. Операция бир неча босқичда ўтказилиши маълум.
Украинанинг Оккупацияни ўрганиш маркази раҳбари Петро Андрюшченконинг сўзларига кўра, Олешкидан эвакуация 30 октябр куни амалга оширилиши мўлжалланган. Шаҳарни тарк этишни истовчилар ҳақида шошилинч тарзда маълумот тўпланмоқда. Эвакуация қандай амалга оширилиши ҳозирча ёпиқ маълумот, дея қўшимча қилган у. Андрюшченко аҳоли қандай олиб чиқилиши – йўллар миналардан тозаланишига боғлиқ бўлишини тахмин қилган. Унинг сўзларига кўра, Киевдаги ҳукумат Украинага кетмоқчи бўлган аҳоли учун Днипро орқали – тўғридан тўғри ўз назорати остидаги ҳудудга йўл ташкил этилишини кутмоқда.
Херсон областининг Россия таъсири остидаги қисмига тайинланган «губернатор» Владимир Салдо эса Олешки аҳолиси РФ томонидан аннексия қилинган Қрим ёки Ростовга эвакуация қилиниши мумкинлигини айтган. Унинг сўзларига кўра, улар учун аллақачон транспорт ва вақтинча жойлаштириш марказлари тайёрлаб қўйилган. Шу билан бирга, Салдо Украинага кетишни истовчиларга ҳам ёрдам кўрсатилишини қўшимча қилган.
