1 ноябр куни Мехикода ўтказилган пойгадан сўнг Антонеллининг умумий ҳисобдаги устунлиги 119 очкога етди. Қолган босқичларда рақиблари бу фарқни йўққа чиқара олмайдиган бўлди.
Мексика Гран-присида Red Bull пойгачиси Макс Ферстаппен ғалаба қозонди. Пойгани биринчи позициядан бошлаган Ferrari вакили Люис Ҳэмилтон эса ундан озгина ортда қолиб, иккинчи ўринни эгаллади.
Антонелли чемпионликни қўлга киритган куни 20 ёш-у 68 кунлик эди. Шу тариқа у германиялик Себастян Феттелнинг рекордини янгилади. Феттел 2010 йилда биринчи чемпионлигини 23 ёш-у 134 кунлигида қўлга киритган ва шу пайтгача «Формула-1»нинг энг ёш чемпиони бўлиб келаётганди.
Болонялик пойгачи Италия тарихида ушбу унвонга сазовор бўлган учинчи спортчига ҳам айланди. Ундан аввал Жузеппе Фарина 1950 йилда, Алберто Аскари эса 1952 ва 1953 йилларда чемпион бўлган. Шу тариқа италиялик пойгачи 73 йилдан кейин яна «Формула-1» чемпиони бўлди.
Антонелли 2024 йилда Mercedes жамоасида синов пилоти сифатида фаолият юритган. 2025 йилги мавсумда у уч марта совриндорлар сафидан жой олган, бироқ ҳеч бир босқичда ғалаба қозонмаган. Ўша мавсумни 150 очко билан еттинчи ўринда якунлаган.
Жорий мавсумда эса унинг натижалари кескин яхшиланди. Антонелли Мексика Гран-присига қадар тўққизта пойгада ғалаба қозонган, уч мартадан иккинчи ва учинчи ўринларни эгаллаганди.
