DW хабарига кўра, суд қарори 1 ноябр, якшанба куни чиқарилган. Суд АҚШ Адлия вазирлигида бундай даъво киритиш учун зарур ҳуқуқий асослар бўлмаган, деган хулосага келган.
Сайловда амалдаги сенатор Дэн Салливан билан бирга нафақадаги ўқитувчи Дэниел Ж. Салливан-кичик ҳам қатнашмоқда. Трамп маъмурияти фамилиядош номзоднинг иштироки сайловчиларни чалғитиши ва овоз бериш натижасига таъсир кўрсатиши мумкинлигини билдирган.
Адлия вазирлиги Демократик партия номзоди Мэри Пелтола ғалаба қозонган тақдирда сайлов натижаларини расман тасдиқламасликни талаб қилган. Шунингдек, иккинчи Салливанга овоз берган сайловчилар аслида амалдаги сенаторни қўллаб-қувватлашни ният қилган-қилмаганини аниқлашни сўраган.
Федерал судья Шэрон Глисон 20 саҳифалик қарорида АҚШ ҳукумати бундай текширувни овоз бериш сирини бузмасдан ўтказишнинг амалий механизмини тақдим этмаганини қайд этган.
Суд жараёнига The New York Times нашридаги мақола туртки бўлган. Унда Пелтола билан алоқадор сиёсий маслаҳатчилар сенаторга фамилиядош номзодни сайловга жалб қилишда иштирок этган бўлиши мумкинлиги айтилган.
Пелтола бу айбловларни рад этган. Reuters агентлиги эса газета келтирган маълумотларни мустақил равишда тасдиқлай олмаганини билдирган.
Суд қароридан сўнг АҚШ Адлия вазирлиги апелляция шикояти бериш ниятини маълум қилган. Трамп эса ўзининг Truth Social ижтимоий тармоғида «сохта Дэниел Ж. Салливан-кичик ғойиб бўлди», деб ёзиб, сиёсий рақибларини яна танқид қилган.
АҚШ Конгрессининг Вакиллар палатаси ва Сенатига оралиқ сайловлар 3 ноябр куни бўлиб ўтади. Аляскадаги сайлов пойгаси Сенат устидан назорат учун курашда муҳим аҳамиятга эга йўналишлардан бири ҳисобланади.
