Reddit инфографика муаллифлари ҳисоб-китобга фақат йирик йўловчи лайнерларини киритмаган. Унда умумий мақсадли авиация самолётлари, бизнес-жетлар, кичик турбовинтли ва минтақавий самолётлар ҳам инобатга олинган.
Рейтингда 2025 йилда шунчаки йиғилган эмас, айнан буюртмачиларга топширилган самолётлар ҳисобланган.
Airbus ва Boeing ўртасида ким олдинда?
Келтирилган маълумотларга кўра, Airbus 793 та, Boeing эса 600 та самолёт етказиб берган. Шу тариқа, икки йирик ишлаб чиқарувчи ўртасида Airbus устун келган.
Бироқ мамлакатлар кесимида натижа бошқача. АҚШ кўрсаткичига Boeing билан бирга Cirrus, Textron Aviation, Gulfstream ва Piper самолётлари ҳам қўшилган:
— Cirrus — 797 та;
— Textron Aviation — 639 та;
— Boeing — 600 та;
— Piper — 291 та;
— Gulfstream — 158 та.
Жами 2485 та самолёт билан АҚШ рейтингда катта фарқ билан биринчи ўринни эгаллаган.
Франция иккинчи, Австрия учинчи ўринда
Францияга жами 960 та самолёт тўғри келган. Бу рақам Airbus’нинг 793 та, Daher’нинг 76 та, Dassault’нинг 37 та, ATR’нинг 32 та ва Elixir’нинг 22 та самолётидан ташкил топган.
Бироқ рейтингнинг муҳим услубий жиҳати бор: муаллифлар Airbus самолётларининг барчасини Франция ҳисобига киритган. Аслида компания самолётлари бошқа мамлакатларда ҳам ишлаб чиқарилади. Шу сабабли рўйхатни самолётлар айнан қайси давлат ҳудудида йиғилганини тўлиқ акс эттирувчи статистика сифатида қабул қилиб бўлмайди.
Учинчи ўринни Diamond Aircraft’нинг 235 та самолёти билан Австрия эгаллаган. Компания асосан умумий мақсадли авиация самолётлари ва мотопланерлар ишлаб чиқаради.
Бразилия ва Италия ҳам кучли бешликда
Бразилия 233 та самолёт билан тўртинчи ўринга чиққан. Шундан 78 таси Embraer’нинг тижорий авиация йўналишига, 155 таси эса бизнес-жетлар ишлаб чиқарувчи Embraer Executive Jets бўлинмасига тўғри келган.
