Nvidia директорлар кенгаши 8 ноябр куни компания асосчиси ва бош ижрочи директори Женсен Хуангга нисбатан мустақил текширув бошлади. Кенгаш Хуанг «хорижий разведка ҳаракатининг нишони» бўлган-бўлмаганини аниқламоқчи. Бундан олдинроқ Хуанг кенгашга бир ишбилармон аёл билан интим муносабатда бўлганини тан олганди.
Nvidia раҳбари атрофидаги можаро 29 октябрда эълон қилинган New York Times суриштирувидан кейин бошланганди. Газета номи ошкор этилмаган АҚШ разведкаси расмийларига таяниб, Хуангнинг Хитой фуқароси Элис Хуанг билан яқин муносабати ҳақида ёзган (икки Хуанг қариндош эмас). Элис Хуанг Сингапурдаги Megaspeed компанияси раҳбарларидан бири бўлган. Бу компания Nvidia чипларини сотиб олган, АҚШ эса ушбу компанияни чекланган чипларни Хитойга ўтказишда гумон қилади.
Элис Хуангга оид даъволар оммага тақдим этилган далилларга эмас, махфий разведка маълумотлари ва улар билан танишган расмийларнинг сўзларига таянади. Хавотирнинг асосий сабаби – Женсен Хуангнинг СИ соҳасидаги ва Оқ уйдаги таъсири. Расмийлар кузатув натижасида Элис Хуанг маълумотларни «тўғридан тўғри Пекинга» етказиб турган, деган хулосага келган.
Нашр манбаларига кўра, Элис Хуанг Megaspeed текшируви доирасида кузатувга олинган. Кузатув унинг АҚШнинг бир фуқароси билан алоқасини кўрсатган, расмийлар исмини сўраганида у Женсен Хуанг бўлиб чиққан. Иккаласи 2024 йил июнида Тайпейдаги барда, 2025 йилда эса ўша шаҳардаги ресторанда бирга кўринган.
Разведка президент Доналд Трампни бу ҳақда тахминан бир йил олдин хабардор қилган. NYT’нинг ёзишича, президент ҳеч қандай чора кўрмаган: у Nvidia’нинг чип савдосига ва Хитой билан савдо муносабатларига путур етишидан эҳтиёт бўлган. Аксинча, 2026 йил майда Трамп Хитойга расмий сафари чоғида Хуангни делегацияга қўшиб олиб борган.
2026 йил баҳорида АҚШ давлат котиби Марко Рубио назоратида ўта махфий меморандум тайёрланган. Унда Элис Хуанг Женсен Хуангни нишонга олиш учун Хитой Давлат хавфсизлиги вазирлиги томонидан ёллангани айтилган. Разведка маълумотларини кўрган расмийлар муносабат романтик эканига амин бўлган.
