Хитойда ўта юқори ҳарорат ва босимли буғда ишлайдиган ултрасуперкритик кўмир энергоблокидан тижорий фойдаланиш бошланди. У бундай энергоблоклар орасида дунёда энг баландда жойлашган. Станциянинг биринчи энергоблоки 168 соатлик синовдан муваффақиятли ўтгач, тижорий фойдаланишга топширилди.
Лойиҳа кўмир энергетикаси соҳасидаги муҳим ютуқ бўлиб, бундай станциялар мураккаб баланд тоғ шароитида ҳам самарали ишлаши мумкинлигини кўрсатди.
Электр станцияси Хитойнинг шимоли-ғарбидаги Цинхай провинциясининг Голмуд шаҳрида, денгиз сатҳидан ўртача тахминан 2 850 метр баландликда жойлашган. У ҳар бири 660 мегаватт қувватга эга иккита энергоблокни ўз ичига олади. Блоклар ултрасуперкритик буғ параметрларига мўлжалланган ускуналар билан жиҳозланган. Станция истеъмолчиларни электр энергияси билан ишончли таъминлаш ва айни пайтда қайта тикланувчи манбалардан электр ишлаб чиқаришдаги тебранишларни қоплаш учун мўлжалланган.
Иккала энергоблок иш режимига ўтгач, станциянинг йиллик электр ишлаб чиқариш ҳажми олти миллиард киловатт-соатга етиши кутилмоқда. Бу тахминан 6,6 миллион кишининг бир йиллик электр энергиясига бўлган эҳтиёжини қоплаш учун етарли.
Янги электр станцияси Цинхай провинцияси энерготизимининг барқарорлиги ва ишончлилигини оширади. Шунингдек, қайта тикланувчи энергия манбаларини катта миқёсда энерготизимга қўшиш учун зарур захира қувватларини таъминлайди.
Бундай баландликда кўмир электр станциясини қуриш жиддий техник қийинчиликлар билан боғлиқ. Ҳавонинг сийраклиги, кислород миқдорининг камлиги ва атмосфера босимининг пастлиги кўмирни самарали ёқишни қийинлаштиради. Бундан ташқари, ёқилғида ишқорий моддалар миқдорининг юқорилиги қозонларда шлак қатламлари пайдо бўлиши ва кул тўпланишига олиб келиши мумкин.
Бу муаммоларни ҳал қилиш учун станцияда ёнишни бошлаш ва барқарор ушлаб туришда кислороддан фойдаланиш технологиялари жорий этилган. Улар жуда паст юкламада ҳам ишлаш имконини беради. Махсус ишлаб чиқилган қозон тизими таркибида ишқорий моддалар кўп бўлган кўмирни ёқишни таъминлайди ва электр энергиясига талаб ўзгаришига мос равишда қувватни бошқаришга имкон беради. Шу тариқа баланд тоғли ҳудудларда кўмир энергетикасига хос бир қатор асосий техник чекловлар бартараф этилиб, соҳада етишмаётган технологик ечим яратилди.
Ултрасуперкритик буғ технологияси кўмир электр станцияларида ўта юқори ҳарорат ва босимдаги буғ ёрдамида электр ишлаб чиқариш имконини беради. Бунда буғ ҳарорати одатда 580°C дан, босими эса 24 мегапаскалдан юқори бўлади. Бир хил миқдордаги кўмирдан кўпроқ энергия олиш ҳисобига станциянинг фойдали иш коэффициенти ошади, ёқилғи сарфи ва чиқариладиган ифлослантирувчи моддалар миқдори камаяди.
