Ular to‘rtta edi - bittasi qoldi

Ne tongki, to‘rtta azamatdan iborat mo‘jaz karvondagi jamoalarimizdan faqat bittaginasi manzil sari hali ham yo‘lda davom etyapti. Qolgan uchchovlon OChL Kubogi deya atalmush cho‘qqining o‘nqir-cho‘nqir yo‘llaridan allaqachon tushib qolgan.

“Bunyodkor” ilk o‘yinida o‘ynoqlab bergan bo‘lsada, keyin nafasi ichiga tushib, harsillaganicha arab va fors jamoalariga talash bo‘ldi.

“Paxtakor” o‘g‘lonlari esa yosh va tajribasizligi bois, kech urinib, endi tomoshabinga aylangan.

Qarshiliklarning guruh bosqichida ko‘rsatgan mazmunli va sifatli o‘yinlari ko‘zni quvontirgani, bor gap. Lekin, samara bo‘lmadi. Ko‘rdik, Ro‘ziqul Berdiyev shogirdlarining saviyasi Osiyodagi yetakchi klublarnikidan hech kam emas ekan. Nasib qilsa, “Nasaf” hali sariq qit'ada, albatta o‘z so‘zini aytadi.

Hayriyatki, “Lokomotiv” uloqchi chavandozlar to‘dasidan chiqib, saralar orasida sovrin talashayotgani ko‘nglimizni ko‘tarmoqda. Jamoamizning harakatlari xuddi nomiga yarasha. Bilasiz, “poyezd jonivor” tezlikni sekin olgani bilan keyin jadallashib boradi. Guruhning avvalidagi ikki o‘yinda ko‘rimsizgina durang qayd etgan temiryo‘lchilar, ilk stansiyaga o‘z vaqtida keldilar. Bugun, “qariyalar” tajribasi va yoshlar shijoati uyg‘unlashgan “Loko”ga imkoniyatlar eshigi juda lang bo‘lmasada, yarim ochilib turibdi. Barchasi ularning o‘zlariga bog‘liq.

Birinchi o‘yin teletranslyatsiyasi davomida sharhlovchi Murod aka Rizayev “Al-Hilol”ni ko‘klarga ko‘tarib, muxlislar ruhini tushirib tashladi. Yaxshiyamki, uning sharhini maydondagi futbolchilar eshitmaydilar. Shaxsan men, o‘sha alqalgan arab jamoasi safida birorta kuchli o‘yinchini ko‘rmadim. O‘sha kuni faqat bitta futbolchi maqtovlarga loyiq edi. U ham bo‘lsa posbonimiz – Ignatiy Nesterov. Ajab, shunday paytlar kelibdiki, arab jamoalari nomining o‘zi ham biznikilarni tahlikaga soladigan bo‘lib qolibdi... Biroq, “Loko” osongina “oq bayroq” ko‘tarib qo‘ymadi. Kerak bo‘lsa, o‘sha kuni arablar bizning jamoa vagonida Jyeparovning yo‘lidan yurishdi.

Ho‘sh, bugun nima bo‘ladi? Safarda gol o‘tkazmagan temiryo‘lchilar millionlab muxlislar ko‘nglini olshga harakat qiladimi? Har ikki savolga javobni kech oqshom bilib olamiz. Faqat, bitta o‘tinch bor. Shu oqshom poytaxt muxlislari stadionni to‘ldirib berishsa zo‘r bo‘lardi-da...

Bugun ishqibozlar ko‘magi “Loko”ga juda zarur. Har qanday yurt futbolining saviyasi halqaro o‘yinlarda bilinadi. Demak, bugun “Lokomotiv” mamlakat sha'ni uchun harakat qilishi lozim.

Barcha ishqibozlar sevimli jamoamizdan g‘alaba kutadi. OLG‘A “LOKOMOTIV!”

Ravshan Hamrozdan:

Azalda yo‘rg‘alab, so‘ng chopgan otni,

Marraga eng avval borar deydilar.

Bizning “Lokomotiv” – “temir otimiz”,

Yangi marra sari naqd ila borar.

G‘alabalar    sari qadam tashlang shahd

Butun O‘zbekiston tilaydi omad!

Elmurod ERMATOV, Ravshan HAMROZ. Andijon.