Muxlis Diyorbek O‘rozboyevning Rio Olimpiadasidagi muvaffaqiyatiga bag‘ishlab she'r bitdi

Ayni pallada qizg‘in tusga kirgan Rio-2016 Olimpiadasida O‘zbekiston terma jamoasi hisobiga dastlabki medalni xorazmlik dzyudochi Diyorbek O‘rozboyev hadya etdi. Mazkur muvaffaqiyatdan ruhlangan o‘zbekistonliklar tahririyatga qo‘ng‘iroq qilishib, o‘z quvonchlarini izhor etishmoqda. Ulardan biri bo‘lmish xorazmlik Bunyodbek Egamberganov Diyorbek O‘rozboyevga bag‘ishlab tabrik she'ri yozgan.

Zafar quchding shukr, balli Diyorbek,
Ishonchin oqlading mag‘rur xalqingning.
Duosi, olqishi, tabrigi senga.
Hech kimdan kam bo‘lma, jasur o‘g‘lonim.

O‘zbekning g‘ururi ori ham senda,
Jismingda bobolar shijoati bor!
Vatan deya tushsang har gal maydonga,
G‘alabang tayindir, sha'ning sharafkor.

Sendagi matonat, sendagi g‘ayrat,
Kelgusi g‘alabang nishonasidek.
Raqibing shvedmi yoki gruzin,
Go‘yo ular asli senga tengmasdek.

Olg‘a borvergin marralar sari,
Dunyoga ko‘rsatgin o‘zbekning kuchin.
Ortingda mardona xalqing qo‘llaydi,
Ezgu orzu uchun, g‘alaba uchun!

Tahririyat tomonidan sportchining otasi Baxtiyor Avazovga qo‘ng‘iroq qilindi. 

M: "Assalomu alaykum Baxtiyor aka. Avvalo, farzandingizning ulkan muvaffaqiyati bilan «Kun.uz» sayti jamoasi nomidan chin qalbimizdan tabriklaymiz. Aytingchi, ayni damda qanday tuyg‘ularni boshdan kechirmoqdasiz?

B.A: "Ochig‘i buni so‘z bilan tariflashning imkoni bo‘lmasa kerak! Hayajonim, xursandchiligimning chek-chegarasi yo‘q. O‘g‘limning medal bilan taqdirlanganini eshitganimda, onasi bilan o‘zimizni qo‘yarga joy topa olmay qoldik. Qarindoshlar, do‘st-birodarlarimizning tabrik yo‘llab qo‘ng‘iroq qilishlaridan hayajonimiz yanada ortdi. O‘g‘limning prezidentimiz, xalqimiz, qolaversa, ustozlarining ishonchini oqlagani menda faxr tuyg‘ularini paydo qildi.

M: "Farzandingizning bolaligi davri haqida ham so‘zlab o‘tsangiz?

B. A: "Diyorbek to‘rt farzandimning ikkinchisi. Maktabda a'lo baholarga o‘qidi. Bolaligidan sportga qiziqqanligi bois, 3-sinfligida kurashning sambo turiga qatnadi. 5-sinfidan buyon dzyudo bilan muntazam shug‘ullanib keldi. Dastlab murabbiyi Umirbek Davletovdan saboqlar oldi. Hozirgi kunda Jamshid Xudoyberganov bilan mashg‘ulotlari olib bormoqda. 

M: "Chempionning otasi sifatida, farzandining chempion bo‘lishini xohlagan ota-onalarga tavsiyalaringiz?

B.A: "O‘g‘lim televizor orqali sportchilarning taqdirlanayotganlarini ko‘rib havas qilar edi. “Men ham chempion bo‘lishim kerak” deya tinimsiz mehnat qildi. Xudoga shukrki, niyatiga erishdi. Ota-onalarga beradigan maslahatim, birinchi galda farzandining qiziqishini inobatga olishsin. Shunga qarab kerakli barcha shart-sharoitlarni yaratib berishsin. O‘g‘limning faoliyatidan kelib chiqib, yana shuni aytib o‘tishim mumkinki, chempionlikka avvalo tinimsiz mehnat, malakali murabbiylardan ta'lim, ota-onadan esa, moddiy va ma'naviy qo‘llab-quvvatlash talab etiladi. Sportga e'tibor boshqa davlatlarda bizning davlatimizdagidek emas. Shunday ekan, barcha yoshlar sport bilan shug‘ullanishsin. Yaratilgan ikoniyatlardan unumli foydalanishsin.

M: "Farzandingizni kutib olish uchun qanday tayyorgarlik ko‘rmoqdasiz?

B.A: "Xudo xohlasa, aeroportga oilaviy kutib olishga chiqamiz. So‘ng, qo‘y so‘yib xalqqa osh berish niyatimiz ham bor. 
Men o‘zimni O‘zbekistonning eng baxtli otasi deb bilaman. Fursatdan foydalanib, mana shunday imkoniyatlar yaratib bergan yurtboshimizga o‘z minnatdorchiligimni bildiraman. 

M: "Nashrimiz jamoasi nomidan sizni va oila a'zolaringizni yana bir bor tabriklab, kelajakda farzandingizdan bundanda ulkan g‘alabalarni kutib qolamiz.