Rio Olimpiadasi yakuniga yetdi

Rio-de-Janeyro shahrida 5 avgust kuni boshlangan 31-Yozgi Olimpiada o‘yinlari mahalliy vaqt bilan 21 avgust oqshomida (Toshkent vaqti bilan 22 avgust kuni erta tongda) yakunlandi. Tadbir Rio-de-Janeyrodagi “Marakana” stadionida bo‘lib o‘tdi. Musobaqalarda 11 mingdan ortiq sportchi ishtirok etdi. Olimpiadada sportning 28ta turi bo‘yicha 306ta sovrinlar majmuasi qo‘lga kiritildi. Bu gal 27ta jahon va 91 ta olimpiada rekordi o‘rnatildi. 2016 yilgi Olimpiada o‘yinlarini o‘tkazish uchun 39,1 milliard real, ya'ni 9,75 milliard dollar sarflandi. Olimpiada o‘yinlari 32 sport inshootida o‘tkazildi. Bu inshootlarning katta qismi Olimpiada uchun maxsus qurilgan bo‘lsa, kichik qismi ta'mirdan chiqarildi.

Shuni ta'kidlash kerak-ki, Braziliya prezidenti vazifasini vaqtincha bajarib turgan Mishel Temer bundan avval, ish vaqti tig‘izligini bahona qilib, Olipiadaning yopilish tadbirlarida ishtirok etmasligini ma'lum qilgan edi. Biroq mahalliy matbuotda Olimpiada ochilish marosimida u nutq so‘zlayotgan vaqtda tomoshabinlar hushtak chalib, xalaqit bergani unga yoqmagani aytilmoqda.

Xalqaro Olimpiya Qo‘mitasi prezidenti Tomas Bax 31-Olimpiada o‘yinlari yakunlanganini e'lon qildi. U 2016 yilgi O‘yinlar tashkilotchilariga minnadorlik bildirdi. “Ana'naga binoan O‘yinlar yakunlanganini e'lon qilaman”, dedi Tomas Bax. U braziliyalikarga murojaat qilar ekan, mehmondo‘stliklari uchun o‘z tashakkurini bildirdi. “Braziliyaliklar sizga rahmat. Murakkab vaziyatlarga qaramay Siz, faxrlanishga arzigo‘lik qadriyatlaringizni namoyon etdingiz. Olimpiada o‘yinlari birdamlik ramziga aylandi. Biz Braziliyaga mehmon bo‘lib keldik, ammo do‘st bo‘lib uyga qaytayapmiz. Siz hamisha yuragimizda qolasiz”, dedi Xalqaro Olimpiada qo‘mitasi prezidenti.

Rio-2016 Olimpiada o‘yinlari tashkiliy qo‘mita raisi Artur Nuzman Olimpiada hamisha Braziliya xalqining, erkagu ayolining, yoshu qarisining yuragida qolajagini ta'kidladi va «hamma braziliyaliklar – Olimpiada qahramonlaridir», dedi.

Olimpiada ma'shalisi Braziliyalik xonanda ijrosidagi qo‘shiq jarayonida so‘ndirildi. Ayni shu daqiqalargina biroz qayg‘uli bo‘ldi. Shundan keyin braziliyaliklar g‘amginlikka yo‘l qo‘yishmadi. Olimpiada ochilish marosimida bo‘lgani kabi yopilishi ham tomoshabinlarda katta taassurot qoldirdi. Tadbir ommaviy ijro etilgan samba raqsi bilan yakunlandi. “Marakana” stadioni ma'lum vaqt ulkan raqs maydonchasiga aylandi. Raqs roppa-rosa 20 daqiqa davom etdi.

Rio-de-Janeyro meri Eduardo Paes Olimpiada bayrog‘ini 2020 yilgi Olipiada o‘yinlariga mezbonlik qiladigan Tokio gubernatori Yuriko Koikega topshirdi. Shundan so‘ng Yuriko Koike Tokio taqdimotini o‘tkazdi. Yaponiya delegatsiyasi to‘rt yildan keyin nimalar bo‘lishi yuzasidan namoyish qilgan taqdimot tomoshabinlarda katta taassurot qoldirdi. Yaponiya bosh vaziri Sindzo Abe 2020 yilda Tokioda bo‘lib o‘tishi kutilayotgan 32-Yozgi Olimpiada o‘yinlari a'lo darajada bo‘lishi uchun hukumat qo‘ldan kelgan hamma ishlarni qilishi borasida va'da berdi. U Rio-de-Janeyro shahrida bo‘lib o‘tgan Olipiada o‘yinlarida ishtirok etgan yaponiyalik sportchilar bilan uchrashar ekan, “Tokiodagi o‘yinlar jahondagi insonlarning yuragidan o‘rin olishiga ishonishi”ni bildirdi. Abe olimpida o‘yinlarida ishtirok etgan yapon sportchilariga o‘zining minnadorchiligini izhor qildi. Rio-de-Janeyroda Yaponiya bosh vaziri Xalqaro olimpiya qo‘mitasi prezidenti Tomas Bax bilan ham uchrashdi. Ular yana to‘rt yildan keyin Yaponiya poytaxtida bo‘lib o‘tadigan Olimpiadani tashkillashtirish va dopingga qarshi kurash bilan bog‘liq masalalarni muhokama qilishdi.

Kanada bosh vaziri Jastin Tryudo Olimpiada o‘yinlarini yaxshi tashkillashtirgani uchun Braziliyaga minnadorchilik bildirdi. U 7 sentabr kuni boshlanadigan Paralimpiya o‘yinlarini intiqlik bilan kutayotganini ta'kidlab o‘tdi.

Rio-de-Janeyro Olimpiada o‘yinlarida 206 ta mamlakat va BMT nomidan muhojirlarning bitta delegatsiyasi – jami 207ta jamoa ishtirok etgan bo‘lsa, atigi 87ta mamlakat sportchisiigina medallarni qo‘lga kiritdi. Oltin medallar esa atigi 59ta mamlakat vakiliga nasib qildi. Iordaniya, Kosovo, Puerto-Riko va Fiji tarixda birinchi bor Olimpiada o‘yinlarining medalini qo‘lga kiritdi.

Rio-de-Janeyroda bo‘lib o‘tgan Olimpiada o‘yinlarida birinchi o‘rin AQShga nasib qildi. «Okean orti» sportchilari 121 medalni qo‘lga kiritdi. Medallarning 46tasi oltin. Ikkinchi o‘rin 67ta medal sohibiga aylangan Buyuk Britaniyaga nasib qilgan bo‘lsa, uchinchi o‘rinni Xitoy egalladi. «Osmon osti mamlakati» sportchilari 70ta medalni qo‘lga kiritdi. To‘rtinchi o‘rin esa 56ta medalga ega bo‘lgan Rossiyaga munosib ko‘rildi.

Mustaqilligimizning 25 yilligi arafasida O‘zbekiston sportchilari Olimpiadaning kuchli 25taligiga kirdi. Hisobida 4ta oltin, 2ta kumush va 7ta bronza bo‘lgan O‘zbekiston Rio-2016 Olimpiadasida 21-o‘rinni egalladi. Bu Yozgi Olimpiada O‘yinlarida Markaziy Osiyo davlatlari orasida eng yaxshi ko‘rsatkichdir. Umumjamoa hisobida O‘zbekiston Qozog‘iston, Shveytsariya, Daniya, Shvetsiya, Ukraina, Belgiya, Polsha kabi davlatlarni ham ortda qoldirdi.

.Olimpiadada oltin medallarni bokschilar Hasanboy Do‘stmatov, Fazliddin G‘oibnazarov, Shahobiddin Zoirov hamda 105 kilogrammgacha bo‘lgan vazn toifasidagi og‘ir atletikachilar musobaqasida o‘zbekistonlik sportchi Ruslan Nuriddinov qo‘lga kiritdi. Markaziy Osiyo davlatlari orasida Qozog‘iston 17 medalni qo‘lga kiritdi. Ulardan 3tasi oltin. Bu bilan Qozog‘iston umumjamoa hisobida O‘zbekistondan keyingi 22-o‘rinni egalladi. Hisobida 1 ta oltin medal bo‘lgan Tojikiston umumjamoa hisobida 58-o‘rinda qayd etildi. Qirg‘iziston hisobida og‘ir atletikachi Izzat Artikov ega bo‘lgan 1ta kumush medal bor edi. Biroq uning qonidan doping topilgani ortidan Qirg‘iziston mazkur medaldan ham mahrum bo‘ldi.

O‘zbekiston jamoasi 2008 yilgi Pekin Olimpiadasidan bitta oltin, ikkita kumush va uchta bronza, jami 6 medali bilan qaytgan bo‘lsa, 2012 yildagi London Olimpiadasida bitta oltin, uchta bronza medal bilan 47-o‘rinni egallagandi.

Boks bo‘yicha O‘zbekiston terma jamoasi a'zolari Rio Olimpiadasida 3 ta oltin, 2 ta kumush, 2 ta bronza medallarini qo‘lga kiritib, umumjamoa hisobida Kuba, Qozog‘iston, Rossiya, AQSh kabi kuchli terma jamoalarni ortda qoldirib, 1-o‘rinni egalladi. Hasanboy Do‘smatov Olimpiada o‘yinlarida texnik mahorat ko‘rsatgani uchun Vel Barker kubogiga sazovor bo‘ldi. Vel Barker Kubogi 1936 yildan beri topshirib kelinadi.

Sportchilarimizga Riodagi yorqin, g‘olibona ishtiroklari uchun o‘z minnatdorchiligimizni bildiramiz. Biz siz bilan farxlanamiz! G‘alabalar muborak bo‘lsin!!!

Sharofiddin To‘laganov / Tnews.uz