Yaponiyaga o‘ta kuchli "Malakas" to‘foni yaqinlashmoqda

Joriy mavsumda 16-bor qayd etilayotgan kuchli to‘fonlardan biri bo‘lmish "Malakas" Yaponiyaga janubi-g‘arbdan yaqinlashmoqda. U o‘zi bilan birga kuchli shamol va jala olib kelmoqda.

Yaponiya meteorologiya bosh agentligi ma'lumotiga ko‘ra, to‘fon markazidagi bosim 930 gektopaskalni tashkil etadi. Bundan tashqari, markazdagi shamol tezligi sekundiga 70 metr tezlikda harakatlanadi.

Ayni damda "Malakas" shimoliy yo‘nalish bo‘ylab, soatiga 20 kilometr tezlikda harakatlanmoqda. Meteorologiyaning prognoz qilishicha, to‘fon mamlakatning Xonsyu oroliga 20 sentabr kuni yetib keladi.
Mutaxassislarning ogohlantirishicha, to‘fon vaqtida to‘lqin balandligi 10 metrga yetadi.