Rossiyada kattalar uchun bolalar bog‘chasi ochildi

Rossiyalik fuqaro Novosibirsk shahridagi tinch joylardan birida, shahar tarixida ilk bor, kattalar uchun bolalar bog‘chasini ochdi. Bu haqda RIA «Novosti» xabar bermoqda.

«Qizim jon-dili bilan bog‘chaga boradi. Kunlarning birida do‘stlarimiz bilan shu haqida gaplashib qoldik. Biz o‘zi qachon baxtli bo‘lganmiz? Bu ancha oldin, bolalik paytlarimizda bo‘lgan ekan. Shunda kattalar uchun bolalar bog‘chasi ochish fikri tug‘ildi», — dedi loyiha muallifi Yevgeniy Pyatkovskiy.

Pyatkovskiyning ma'lum qilishicha, ushbu bolalar bog‘chasiga tashrif buyuruvchilarga sobiq ittifoq paytidagi singari an'anaviy taomlar beriladi. Shunga muvofiq katta “bog‘cha bolalariga” tarbiyachilar bilan mashg‘ulotlar o‘tkazish ham taklif etiladi. O‘n kishidan iborat guruh a'zolari kuylashlari, plastilindan narsalar yasashi va ijodning boshqa turlari bilan shug‘ullanishlari mumkin bo‘ladi.

Aniqlik kiritilishicha, ushbu bolalar bog‘chasida bo‘lishning bir kunlik haqi 3 ming rubl. Hozircha ushbu loyihaga 28 yoshdan 40 yoshgacha bo‘lgan erkaklar va 23 yoshdan 30 yoshgacha bo‘lgan ayollar qiziqish bildirishgan.