O‘zbekiston Respublikasi Oliy Majlisi huzuridagi nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash Jamoat fondi tomonidan “Namangan yoshlar markazi”ga moliyalashtirilgan “Oila sog‘lom – jamiyat mustahkam!” nomli grant loyihasi doirasida Namangan shahar 2-tibbiyot kollejida “Ommaviy madaniyat” – ma'naviyat kushandasi mavzusida davra suhbati o‘tkazildi.
Joriy yil 10 oktabr kuni bo‘lib o‘tgan tadbirda Namangan viloyati hokimligining bosh mutaxassisi Tohirjon Dedaxanov, kollejning o‘quv ishlari bo‘yicha direktor o‘rinbosari Raxmatullo Muxitdinov, Namangan shahridagi “Yaxyohon to‘ra” jome masjidi imom xatibi Nurilloxon Jamalov, FJMQMI viloyat hududiy bo‘linmasi katta mutaxassisi Hikmatillo Raxmatullayev, “Namangan yoshlar markazi”ning “Psixologik maslahat markazi” rahbari Saidakbar Mutalov, Markazning “Yosh jurnalistlar” to‘garagi rahbari Hojiakbar Pattayev va kollejning 200 nafar o‘quvchi va ustozlari ishtirok etdilar.
Tadbir Markaz tomonidan yoshlarda shukronalik tuyg‘usiga chorlovchi “Tichlik ulug‘ ne'mat” nomli videorolik bilan boshlandi.
Davra suhbatida bir necha yillar davomida viloyatimizdagi ma'naviy-ma'rifiy jarayonlardagi samarali faoliyati bilan keng jamoatchilik o‘rtasida alohida hurmat qozongan T.Dedaxanov so‘z olib, yoshlarning ma'naviy saviyasini yanada oshirish, ularda ona Vatanimizga bo‘lgan sadoqat, ota-onaga bo‘lgan hurmat tuyg‘ularini kuchaytirish, “ommaviy madaniyat”ning tahdidlaridan ogoh etish va undan muhofazalanish, yoshlarning birinchi Perezidentimiz muhtaram Islom Karimov istaganlaridek ilg‘or va faol bo‘lish orqali kelajakda yuksak marralarni egallash va yurt koriga yaraydigan farzand bo‘lishlari xususida fikr - mulohazalari yoshlar qalbida ijobiy taassurotlarni muxrlanishida ahamiyati katta bo‘ldi.
Shuningdek, o‘z faoliyatining tajribali vakili “Yil imomi” Respublika ko‘rik-tanlovining viloyat bosqichi g‘olibi N.Jamalov ham o‘z ma'ruzasida yuqoridagi mavzu yuzasidan atroflicha fikr bildirib, ota-bobolarimizning pand-nasihatlari va hayotiy mislollar orqali yoshlar o‘rtasida yaratilgan cheksiz imkoniyatlardan yanada unumli foydalanishga chorlab, o‘zining foydali va hikmatga boy tavsiyalarini berib o‘tdi.
Ayniqsa, yoshlarga tengdosh-tengdosh tamoyili asosida so‘z olgan, “Mustaqillikning 25 yilligi” esdalik nishoni sohibi, loyiha rahbari hamda Istiqlol tengdoshi H.Pattayev tomonidan, yoshlarning ijtimoiy faolligini yanada oshirish, turli zararli illatlar domidan yoshlarni ogoh etishga qaratilgan qiziqarli interfaol o‘yin shaklidagi chiqishlari barchaning olqishiga sazovor bo‘ldi.
Shu bilan birga loyiha koordinatori, yurtimizda yoshlarga yaratilgan cheksiz imkoniyatlardan unumli foydalanib, ko‘plab Respublika tanlovlarining g‘olibiga aylanib ulgurgan S.Mutalov tomonidan o‘tkazilgan psixologik so‘rovnomalar, “Aqliy hujum” tarzidagi noan'anaviy yondashuv va qizg‘in baxs – munozara tadbirdan ko‘zlangan maqsadga yetkazdi desak mubolag‘a bo‘lmaydi.
