Iroqda IShID jangarilari turmush tarzi qoidalari yozilgan materiallar topildi

Iroqning IShID terrorchilik guruhidan ozod qilingan hududlarida harbiylar jangarilar turmush tarzi qoidalari yozilgan bosma materiallarni aniqlashdi, deb xabar bermoqda Reuters axborot agentligi. 

Bosma materiallar savol va javob ko‘rinishidagi qoidalar tarzida taqdim qilingan. Jumladan, materiallarda terrorchilik guruhi a'zosi qanday to‘g‘ri ibodat qilishi, tashqi ko‘rinishning qanday talablariga amal qilishi haqida gapirilgan. Qoidalarda IShID jangarilariga kalta shimlar kiyishga ruxsat berilgan. Shuningdek, qirib tashlanishi ruxsat berilmaydigan soqollar "durust uzunlikda" bo‘lishi ta'kidlangan. 

Muqovasida zargarlik buyumlari va bug‘doy tasviri tushirilgan kichik kitobchada qanday qilib xayr-ehson qilish haqida ham tushuncha berilgan. Unda muntazam ravishda xayr-ehson qilmaydiganlarni jazo kutishi aytilgan.

Bundan tashqari, jangarilarni internet yoki mobil aloqadan foydalanish ishtiyoqidan qaytarish uchun IShID rahbariyati tomonidan "Men sun'iy yo‘ldosh antennasini nima uchun yo‘q qilishim kerak" deb nomlangan kitobcha chop etilgan bo‘lib, unda buning 20 ta sababi keltirilgan. Xususan, ularda "yo‘ldoshli aloqa kanallari yalang‘och ayollar, ishqiy munosabatlarni ko‘rsatishi, ular orqali ko‘rsatiluvchi ko‘rsatuvlarda nomaqbul so‘zlar ishlatilishi" aytilgan. 

Ma'lum qilinishicha, kitobdagi "hayot qoidalariga" amal qilmaslik qoidabuzarlikning og‘irligiga qarab ommaviy jazolash yoki qatl etish bilan jazolanishi aytilgan.