Janubiy Koreya prezidenti Pak Kin Xe o‘z dugonasining davlat ishlariga aralashgani ehtimoli haqidagi xabarlardan keyin mamlakatda boshlangan ommaviy tartibsizliklar tufayli OTIH (Osiyo-Tinch okeani iqtisodiy hamkorligi) sammitidagi ishtirokini bekor qildi. Bu haqda Assosiated Press xabar bergan.
Mamlakat Tashqi ishlar vazirligi tomonidan ma'lum qilinishicha, hozirgi davlat rahbari OTIH sammitini o‘tkazib yuboradigan ilk prezidentga aylanishi mumkin. Sammit a'zolari 1993 yildan buyon har yili uchrashib keladi.
Shu bilan bir vaqtda prezident vakili qayd etganki, Pak Kin Xe ayni vaqtda Shimoliy Koreya bilan bog‘liq muammolar haqida qayg‘urayotgani uchun sammitga bora olmaydi.
Janubiy Koreya poytaxti Seulda 5 noyabr kuni prezidentning iste'fosini talab qilib minglab kishilar ko‘chalarga chiqdi. Bunga u o‘zining 40 yillik dugonasi, korruptsion mojaroda ayblangan Tsoy Sun Silga davlat hujjatlarini ishonib topshirgani haqidagi xabarlar sabab bo‘ldi.
Ma'lum bo‘lishicha, Sil prezidentning nutqlarini ular rasman ma'lum qilingunga qadar tahrir qilgan. Tsoy Sun Sil shaxsiy va tijorat maqsadlarida prezidentga ta'sir qilganlikda gumon qilinmoqda. Jumladan, huquq-tartibot muassasalarining ma'lum qilishicha, uning ikkita jamg‘armasi – MIR va K-Sport yirik biznesdan pul yig‘ish bilan shug‘ullangan. Joriy haftada ayol hibsga olindi.
Mitingda 40 mingga yaqin kishi ishtirok etgan.
4 noyabrda ma'lum qilingan ma'lumotlarga ko‘ra, prezidentning reytingi rekord darajagacha tushib ketgan va 5 foizni tashkil qilmoqda.
Pak Kin Xening dugonasi va uning ikki sobiq yordamchisi davlat ishlariga aralashishda ayblanib, hibs qilingan.
