Asad: Erdo‘g‘an Usmoniylar imperiyasi davrida yashayapti

Suriya prezidenti Bashar Asad Turkiya armiyasining Suriya hududida olib borayotgan harbiy amaliyotlari xususida o‘z fikrini bildirgan. Asadning bayonot berishicha, u mazkur amaliyotlarni qabul qila olmaydi. Suriya yetakchisi Radio e Televisao de Portugal (RTP)ga bergan intervyusida shu haqda so‘z yuritgan.

Bashar Asad jurnalist tomonidan Turkiya harbiylarining Suriya hududidagi amaliyotini ma'qullaysizmi?, degan savoliga salbiy javob berib, Turkiya prezidenti Rajab Toyyib Erdo‘g‘anni «kasal inson» deb atagan.

«Siz kasal odam haqida gapirayapsiz. U  — buyuklik kasaliga yo‘liqqan prezident. U hozirgi zamonda emas, o‘tmishda, Usmoniylar imperiyasida yashayapti. U haqiqatdan uzilib qolgan», — degan Asad Erdo‘g‘an haqida fikr yuritar ekan. 

Suriya rahbarining so‘zlariga ko‘ra, terrorchilar Suriya hududiga «Turkiya orqali va Erdo‘g‘anning qo‘llab-quvvatlashi vositasida kirib kelishgan».

Erdo‘g‘an oktabr oyida Turkiya armiyasining Suriyadagi harbiy amaliyotlari xususida so‘z yuritib, u Al-Bab va Manjib shaharlarini himoya qilishga qaratilganini qayd etgan, ammo Halab shahriga yetib bormasligini ta'kidlagan edi.