Intercept nashri MXAning Nyu Yorkdagi maxfiy tinglash markazini aniqladi

Tarmoq nashrlaridan biri bo‘lgan The Intercept AQSh Milliy xavfsizlik agentligi xodimlarining qaysi binoda telefon muloqotlari, internet xabarlarni o‘g‘irlash bilan shug‘ullanishlarini aniqladi. U Nyu York shahri markazidagi AT&T telekommunikatsiya kompaniyasiga tegishli ekani aytiladigan ko‘pqavatli, derazalardan xoli, kulrang tusdagi binodir, deb yozadi nashr. 

Jurnalistlar olib borgan surishtiruv natijalariga ko‘ra, Manxettenning gavjum mavzelaridan birida joylashgan bino maxsus xizmatlar xodimlari orasida Titanpointe deb nomlanadi. 29 qavatli bino 1969-1974 yillarda qurilgan. Unda, rasman AT&T kompaniyasining kommunikatsiya markazi joylashgan.

Biroq, The Intercept o‘tkazgan surishtiruvlarga ko‘ra, "bu osmono‘par bino shunchaki xalqaro qo‘ng‘iroqlarni taqsimlaydigan markaz" emas. "U MXAning AQSh hududidagi muhim razvedka binolaridan biri hisoblanadi. Bu yerda, telefon qo‘ng‘iroqlari, faks xabarlar, internet-ma'lumotlarini ushlaydigan maxfiy kuzatuv markazi joylashgan", - deyiladi xabarda. 

Jurnalistlarning uqdirishlaricha, aynan ushbu binodan "BMT, Xalqaro valyuta jamg‘armasi, Jahon banki hamda AQShning Germaniya, Yaponiya va Fransiya kabi ittifoqchi mamlakatlari qatori 38 davlat nishonga olingan". Nashr xodimlari, AQSh sobiq pudratchisi Edvard Snouden taqdim etgan ma'lumotlarni o‘rganish hamda AT&T kompaniyasining sobiq xodimlariga bino arxitekturasiga oid savollar berish orqali shunday xulosaga kelgan. MXAdagilar ushbu taxminlarni izohlashdan bosh tortishgan.