2016 yil 18 noyabr kuni O‘zbekiston “Milliy tiklanish” demokratik partiyasidan O‘zbekiston Respublikasi Prezidentligiga nomzod Sarvar Otamuratovning Toshkent viloyati saylovchilari bilan uchrashuvi bo‘lib o‘tdi. Bu haqda O‘zMTDP Toshkent viloyati Kengashi Axborot xizmati xabar bermoqda.
Uchrashuvda turli sohalar, davlat va jamoat tashkilotlari vakillari, xotin-qizlar, yoshlar, mahalla faollari, partiya a'zolari hamda ommaviy axborot vositalari xodimlari ishtirok etdilar. Uchrashuv viloyatning barcha tuman va shaharlaridagi saylovchilar bilan onlayn videokonferentsaloqa tarzida tashkil etildi.
Uchrashuvni Xalq deputatlari Toshkent viloyati Kengashidagi O‘zbekiston “Milliy tiklanish” demokratik partiyasi guruhi rahbari Abdujabbor Saydullayev ochib berdi va ayni paytda saylovoldi tashviqoti jarayoni qizg‘in pallaga kirganligini ta'kidladi. Nomzod va uning ishonchli vakillari joylarda saylovchilar bilan uchrashuvlar orqali, partiya tashviqot guruhlari ommaviy axborot vositalarida Sarvar Otamuratovning saylovoldi Dasturini qonunda belgilangan shakl va usullarda keng tashviqot qilayotganligini aytib o‘tdi.
Nomzodning Toshkent viloyatidagi ishonchli vakili Shuhrat Nasimov ishtirokchilarga Sarvar Otamuratovni tanishtirar ekan, uning tarjimai holiga batafsil to‘xtaldi.
Shundan so‘ng, O‘zbekiston Respublikasi Prezidentligiga nomzod Sarvar Otamuratov saylovoldi Dasturi yuzasidan nutq so‘zladi.
Nomzod o‘z so‘zida, Toshkent viloyati rivojlangan sanoati, iqtisodiyotni ravnaq topishiga imkon beruvchi geografik o‘rni, ulkan ma'dan va xom ashyo zahirasi bilan respublikada alohida o‘ringa ega ekanini ta'kidladi. Viloyat mehnatkashlari o‘z fidoiyligi va bunyodkorlik salohiyati bilan mamlakatimizda amalga oshirilayotgan izchil islohotlarga munosib hissa qo‘shib kelishayotganini e'tirof etib o‘tdi.
O‘zbekiston “Milliy tiklanish” demokratik partiyasidan O‘zbekiston Respublikasi Prezidentligiga nomzod Sarvar Otamuratov bevosita saylovoldi Dasturda belgilangan vazifalarga saylovchilar e'tiborini qaratar ekan, tarixiy, madaniy, boy ma'naviy-axloqiy qadriyatlar va an'analar asosida jamiyatda yuksak huquqiy va siyosiy madaniyatni mustahkamlash hamda ma'naviy yuksalishga erishish masalalariga ustuvor ahamiyat qaratilganini ta'kidladi.
Xususan, Dasturda mamlakatimizda milliy iqtisodiyotni yanada rivojlantirishning aniq mexanizmlari aks ettirilgan. Nomzod “Xalqning ma'naviy-ruhiy tiklanishi — iqtisodiy islohotlarning negizidir” tamoyili ostida Vatanimiz taraqqiyoti va xalqimiz farovonligi oshishida iqtisodiyot hal qiluvchi ahamiyatga ega deb hisoblaydi.
