Saylovlar barcha fuqarolarni mamlakatning porloq kelajagi yo‘lida birlashtirishga xizmat qiladi

Indoneziya parlamentida O‘zbekistonda bo‘lib o‘tadigan Prezident sayloviga bag‘ishlangan brifing bo‘lib o‘tdi.

Mazkur mamlakat parlamenti deputatlari, ekspert doiralari va OAV vakillaridan tashkil topgan tadbir ishtirokchilariga O‘zbekistonda bo‘lib o‘tadigan muhim siyosiy tadbirga tayyorlarlikning umumqabul qilingan demokratik tamoyillar asosida boryotgani haqida ma'lumot berildi.

Ular shuningdek, mamlakat rahbari lavozimiga nomzodlarning saylovoldi dasturlari bilan ham tanishdilar. Saylov kampaniyasining oshkoralik va ochiqlik muhitida amalga oshirilayotgani alohida qayd etildi. Jumladan, saylovga tayyorgarlik va uni o‘tkazish bo‘yicha barcha tadbirlarda, saylov kuni ovoz berish xonalarida va har bir saylov uchastkasida ovozlarni hisoblash jarayonida siyosiy partiyalardan bittadan kuzatuvchi, OAV vakili, boshqa davlatlar va xalqaro tuzilmalardan kuzatuvchilar qatnashish huquqiga egadirlar.

Tadbir mehmonlari mamlakatimiz saylov organlarining yuksak darajada mas'uliyatli ekanligini yorqin namoyon qilayotgan saylovga tayyorgarlik ishlarini yuqori baholadilar.

Indoneziya parlementi Xalq vakillari palatasi spikeri o‘rinbosari Fadli Zonaning fikriga ko‘ra, ushbu muhim tadbirga tayyorgarlik xalqaro me'yorlar va milliy qonunchilik talablariga to‘la mos ravishda olib borilmoqda.

- Bo‘lib o‘tadigan saylov O‘zbekistonda amalga oshirilayotgan keng ko‘lamli yangilanishlarning davom etishiga turtki bo‘lishi kerak, - dedi u. - Saylovlar barcha fuqarolarni mamlakatning porloq kelajagi yo‘lida birlashtirishga xizmat qiladi.

2014 yilda mamlakatingizda bo‘lib o‘tgan parlament saylovida xalqaro kuzatuvchi sifatida qatnashgan chog‘imda men ko‘pgina saylov uchastkalarida bo‘ldim. Saylovchilarning katta qismi ushbu tadbirda ishtirok etishi, ularning faolligi hamda bunga uyg‘un tarzda olib borilayotgan Markaziy saylov komissiyasining faoliyati bo‘lib o‘tadigan saylov ham yuksak tashkiliy darajada amalga oshiriladi, degan xulosaga kelishga imkon beradi.

O‘zbekistonda aholi farovonligini yanada oshirish, jamiyatni demokratlashtirish, iqtisodiyotning barcha sohalarini modernizatsiya qilish, aholi turmushi sharoitini uzluksiz rivojlantirish borasida bosqichma-bosqich amalga oshirilayotgan tadbirlar fuqarolarning bo‘lib o‘tadigan saylovda faol ishtirok etishiga xizmat qiladi.