FIFAning JChni xususiylashtirish rejasi to‘xtatildi

UYeFA boykot qildi

UYeFA va KONKAKAF Infantinoning tashabbusiga qat’iyan qarshi chiqishdi – bu esa ovozlarning qariyb yarmi demakdir. Qit’alar konfederatsiyalari vakillari Infantinoning loyihasi haqida dastlab OAVdagi xabarlardan xabar topishgani, shundan keyingina FIFA press-relizi kelganini aytishgan. Ya’ni manfaatdor tomonlar bilan oldindan hech qanday rasmiy muhokamalar va maslahatlashuvlar o‘tkazilmagan.

UYeFAning barcha 55 ishtirokchi nomidan e’lon qilingan rasmiy bayonotida agar ulushni sotish to‘g‘risida qaror qabul qilinsa, konfederatsiya jahon chempionatlarini boykot qilishi ma’lum qilingan. Yevropaliklar agar bu loyiha ma’qullanadigan bo‘lsa, barcha qarorlar faqat aksiyadorlar manfaatlarini ko‘zlab qabul qilinishidan xavotirda edi.

Shimoliy va Janubiy Amerika mamlakatlarini o‘z ichiga oluvchi KONKAKAF saytidagi bayonotda ham konfederatsiya a’zolari FIFA prezidenti taklifini rasman rad etgani ma’lum qilindi.

Osiyo va Avstraliyani ifoda etuvchi OFK esa taklifni rasman rad etmadi, ammo FIFA taklifni baholash uchun barcha manfaatdor tomonlarga batafsil ma’lumot va yetarlicha vaqt berishi lozimligini ta’kidladi.

Klublar ham qarshi chiqdi

Infantinoning bu loyihasiga nufuzli futbol klublari ham norozilik bildirdi, FIFA prezidentining katta maslahatchisi esa iste’fo berib yubordi. Muqaddam AQSh futbol federatsiyasini boshqargan Karlos Kordeyro so‘nggi paytlarda Infantinoga Oq uyga tashriflari chog‘ida tez-tez hamrohlik qilayotgandi. 31 iyulgacha u prezident maslahatchisi edi, biroq norozilik belgisi sifatida lavozimini tark etishga qaror qildi. «Aniqlik kiritishimga ruxsat bering. Men bu taklifda ishtirok etmaganman va unga mutlaqo qarshiman», – dedi Kordeyro.

Bloomberg manbalari xabar berishicha, kamida to‘rtta futbol klubi – Madridning «Real», Turinning «Yuventus», Myunxenning «Bavariya» va Dortmundning «Borussiya» klublari yangi tashabbusga qarshi chiqqan. Ular FIFA alohida tijorat tuzilmasini yaratish vakolatiga ega emas, degan fikrda. Agentlik suhbatdoshlari qo‘shimcha qilishicha, «Real» va «Yuventus» vakillari bu masala bo‘yicha Yevropaning boshqa klublari bilan muzokaralar olib borib, klublar o‘rtasidagi jahon chempionatini boykot qilish masalasini o‘rtaga tashlagan.

Infantinoning bayonoti

Futbol konfederatsiyalarining keskin noroziligi FIFA prezidenti Janni Infantinoni ortga chekinishga va taklifini qaytarib olishga majbur qildi.

Infantino bu borada bayonot berib, barcha fikr-mulohazalar o‘rganib chiqilganidan so‘ng ushbu tashabbus futbol jamoatchiligi orasida kelishmovchiliklarni kuchaytirgani ma’lum bo‘lganini aytdi.

«Barcha nuqtayi nazarlarni diqqat bilan tingladik. Loyiha turli qarama-qarshiliklarga sabab bo‘ldi va bu endi uning dastlabki maqsadiga mos kelmaydi. Bizning asosiy vazifamiz har doim futbolni birlashtirish va rivojlantirish bo‘lib qoladi», – dedi Infantino.

U FIFA ushbu taklif ustida ishlashni to‘xtatishini ma’lum qilgan. Shu bilan birga, yaqin vaqtlar ichida barcha manfaatdor tomonlar ishtirokida uchrashuv o‘tkazilib, futbolni yanada rivojlantirish masalalari muhokama qilinishi qo‘shimcha qilingan.