Saylov kuni Samarqandda jamoat transportidan foydalanish bepul bo‘ladi

4 dekabr kuni bo‘lib o‘tadigan muhim siyosiy tadbir – O‘zbekiston Respublikasi Prezidenti saylovida ovoz berish huquqiga ega bo‘lgan aholining faol ishtirok etishi uchun barcha shart-sharoitlar yaratilmoqda. Bu borada viloyatdagi qator korxona-tashkilotlar ham bevosita ishtirok etish xohishini bildirmoqda.

Xususan, “Samarqandtrans” markazi tasarrufiga kiruvchi korxona-tashkilotlar saylov kuni olis masofadan kelib ovoz beradigan saylovchilarga bepul xizmat ko‘rsatish tashabbusi bilan chiqdi. 

- Saylov bo‘lib o‘tadigan yakshanba kuni viloyatimiz hududida “Samarqandtrans” markaziga qarashli korxonalarning 733 ta avtobusi, 136 ta “Damas” rusumli transport vositasi va 70 ta mikroavtobusi aholining bevosita saylovda ishtirok etishida bepul xizmat ko‘rsatadi, - deydi  markazning yo‘lovchi tashishni muvofiqlashtirish bo‘limi mutaxassisi Ergash Murodov. – Shuningdek, Samarqand shahrida yo‘nalishlarda qatnayotgan 161 ta avtobus ham yurtdoshlarimizning beminnat xizmatida bo‘ladi.