Janubiy Koreya prezidenti Pak Kin Xe taqdiri hal etiladi

Bugun 9 dekabrda Janubiy Koreya prezidenti Pak Kin Xening hokimiyat tepasida qolishi masalasi hal etiladi. Gap shundaki, mamlakat parlamenti davlat rahbari taqdirini ko‘rib chiqadi. Mazkur masala bo‘yicha ovoz berish jarayoni bir palatali Milliy majlisda o‘tkaziladi, deb xabar qilmoqda RIA Novosti agentligi. 

Bunga Pak Kin Xe atrofida ro‘y bergan korrupsiya mojarosi va uning dugonasi Tsoy Sun Silning prezident bilan tanishligidan g‘arazli maqsadlarda foydalangani fosh etilgani sabab bo‘ldi. U turli yirik korporatsiyalardan xayriya maqsadlarida pul o‘tkazmalari olgani yetmaganidek, davlat ishlariga ham aralashgan, prezident ma'ruzalariga tuzatishlar kiritgan. 

Impichment e'lon qilinishi uchun parlamentning 300 deputatidan 200 nafari loyihani qo‘llab-quvvatlashi lozim. Hukmron "Senuri" ("Yangi gorizontlar") partiyasi Milliy majlisda yetakchilik qilishi hisobga olinsa, uning kamida 28 nafar a'zosi ham impichmentni qo‘llab-quvvatlashi kerak. 

"Senuri" partiyasining prezidentga qarshi guruhi 40 ta shunday ovozni kafolatlagan. 

Agar impichment qabul qilinsa, bu Janubiy Koreya tarixida ikkinchi shunday siyosiy voqelik bo‘ladi. Eslatib o‘tamiz, bundan avval, mamlakat parlamenti 2004 yilda Demokratik kuchlari vakili No Mu Xyonni prezidentlikdan chetlatishga qaror qilgan edi. Mahalliy nashrning yozishicha, Pak Kin Xe o‘shanda deputat sifatida impichment uchun ovoz bergandi. 

Garchi so‘nggi qarorni Konstitutsiyaviy sud qabul qilsa-da, endilikda, Pak Kin Xening boshiga ham shundy ko‘rgiliklar soya solmoqda. No Mu Xyon bilan bog‘liq hodisada sud impichmentni rad etgan, shunga ko‘ra, bu safar ham hal qiluvchi so‘zni yana sud aytadi. 

Rasman Pak Kin Xe vakolati 2018 yil fevralida poyoniga yetadi. Agar ushbu mojaro bo‘lmaganida, davlat rahbarligi uchun saylov 2017 yil oxirida bo‘lib o‘tishi kerak edi. 

Shunday qilib, impichment e'lon qilinsa, Pak Kin Xe vakolatlarini topshiradi,  Konstitutsiyaga ko‘ra, bosh vazir muvaqqqat prezident bo‘ladi. U Konstitutsiyaviy sud qarorigacha bu vazifani bajarib turadi. Sud tarkibidagi 9 nafar hakamdan 6 nafari olti oy mobaynida impichmentni ma'qullasa, u kuchga kiradi. Ikki oy ichida navbatdan tashqari prezidentlik saylovi o‘tkaziladi. 
 
Mabodo, impichment loyihasi qabul qilinmasa, prezident Pak Kin Xe o‘zi va'da qilganidek, 2017 yil aprelida iste'foga chiqishi mumkin. Va iyun oyida navbatdan tashqari prezidentlik saylovi tashkil etiladi.