AQSh prezidenti Donald Tramp Amerika harbiylari Janubiy Koreya bilan harbiy mashg‘ulot o‘tkazishidan norozi ekanini va Pentagon rahbari Pit Hegsetga qo‘shma harbiy mashg‘ulotlar dasturini «sezilarli darajada qisqartirish»ga buyruq berganini bildirdi .
KXDRni tiyib turishga qaratilgan Ulchi Freedom Shield nomli harbiy mashg‘ulotlar dushanba kuni boshlanib ketgan.
«Shimoliy Koreya rahbari Kim Chen In bilan juda yaxshi munosabatlarimni inobatga olsak (ular oxirgi bor 2019-yilda uchrashgandi), Qo‘shma Shtatlar allaqachon Janubiy Koreya bilan qo‘shma harbiy mashg‘ulotlarda ishtirok etishga rozi bo‘lganidan noroziman», – deya yozgan Tramp Truth Social ijtimoiy tarmog‘ida.
U Seul Eronga qarshi urushda AQShga qo‘shilishdan bosh tortganidan shikoyat qilgan:
«Men yaqinda Janubiy Koreya prezidentidan Eron Islom Respublikasini yadrosizlashtirishda bizga qo‘shilishni xohlaysizmi, deb so‘radim, ular „Yo‘q, rahmat!“ deb javob berishdi».
«Bu mashg‘ulotlar nafaqat qimmatga tushadi – xarajatlarning katta qismini odatdagidek AQSh to‘laydi – balki Donald Tramp prezidentligi davrida tahdid tug‘dirmaydigan va hurmat ko‘rsatadigan mamlakatga mutlaqo noo‘rin va dushmanlik signalini yuboradi», – deya qo‘shimcha qilgan Amerika rahbari.
Tramp keyingi 11 kun davomida bo‘lib o‘tadigan mashg‘ulotlarni bekor qilish juda kech bo‘lgani, shuning uchun u mudofaa vaziri Pit Hegsetga ularning ko‘lamini «sezilarli darajada qisqartirish»ni buyurganini aytgan.
- AQSh va Janubiy Koreya muntazam ravishda qo‘shma harbiy mashg‘ulotlar o‘tkazib keladi, qolaversa, Janubiy Koreya hududida Amerikaning xorijdagi eng yirik harbiy bazasi – Kemp-Hamfriz joylashgan. Bugundan boshlangan mashg‘ulotlarda minglab harbiy xizmatchilar va harbiy texnikalar ishtirok etadi. Mashg‘ulotlar Shimoliy Koreya tahdidlariga qarshi tayyorgarlikni oshirishga qaratilgan bo‘lib, uchuvchisiz uchish apparatlariga qarshi kurashish, GPS’ni o‘chirish va kiberhujumlarni qaytarish bo‘yicha mashg‘ulotlarni o‘z ichiga oladi.
- KXDR muntazam ravishda AQSh-Janubiy Koreya qo‘shma mashg‘ulotlarini tanqid qilib keladi, deb eslatadi CNN. Shimoliy Koreya Tashqi ishlar vazirligi 17-avgust kuni boshlanadigan mashg‘ulotlarni «tajovuzkor urush repetitsiyasi» va o‘z xavfsizligiga «jiddiy tahdid» deb atagan.
