Foydalanuvchilar LG kompaniyasini televizor yordamida suhbatlarni maxfiy tinglashi va sun’iy intellektni o‘qitish uchun ma’lumot to‘plashi mumkinligida ayblay boshladi. Texas bosh prokurori Ken Pakston LG (va boshqa bir qancha kompaniyalar) ustidan da’vo arizasi kiritib, ularning televizorlari egalarining roziligisiz ekran tasvirlarini olishini da’vo qilganidan so‘ng vaziyat yanada keskinlashdi.
Da’vo arizasi kiritilganidan ko‘p o‘tmay, LG foydalanuvchi kelishuvini yangiladi. Biroq yangi bandlar yanada ko‘proq savollar tug‘dirdi, deb yozdi BGR nashri.
LG televizori suhbatlaringizni «tinglaydimi»?
LG kompaniyasining yangilangan shartlarida ta’kidlanishicha, ularning televizorlari qurilma yaqinidagi odamlarning nutqini yozib olishga qodir bo‘lgan sun’iy intellektga asoslangan ovozni aniqlash xizmatlaridan foydalanadi. Shu bilan birga, tinglash va maxfiylik to‘g‘risidagi qonunlarga rioya qilish mas’uliyati amalda televizor egasining zimmasiga yuklatilmoqda.
Boshqacha aytganda, foydalanuvchi o‘z uyidagi mehmonlar va yaqinlari ovozli ma’lumotlar qayta ishlanishi ehtimolidan xabardor ekanligiga hamda bunga roziligiga ishonch hosil qilishi kerak. Aynan shu band ko‘plab tanqidlarga sabab bo‘ldi: qurilma egalari buni LG mas’uliyatni foydalanuvchilarning o‘ziga yuklashga urinayotgani sifatida qabul qildi.
Keyinroq LG ushbu vaziyatga izoh berib, LG televizorlari xonadagi suhbatlarni to‘plamasligi, yozib olmasligi va saqlamasligini, bunday imkoniyatga ega har qanday funksiyalar ixtiyoriy ekanini ta’kidladi.
Biroq bu bayonot LG kompaniyasining avvalroq e’lon qilgan hujjatiga zid keladi. Unda kompaniya televizorlari atrof-muhitdagi suhbatlarni to‘plashi, yozib olishi va saqlashi mumkinligi aytilgan.
Bu LG bilan bog‘liq birinchi janjal emas
LG kompaniyasida maxfiylik bilan bog‘liq muammolar avval ham yuzaga kelgan. Xususan, 2013-yilda kompaniya Smart TV egalarini kuzatishda ayblangan edi. Shunda televizorlar suhbatlarni yozib olmagan, biroq egalari tomosha qilgan telekanallar va dasturlar haqida doimiy ravishda ma’lumot to‘plab borgan. Jamoatchilik e’tirozlaridan so‘ng LG ushbu muammoni hal qiluvchi dasturiy ta’minot yangilanishini chiqargan.
