Yaponiya bosh vaziri: Vladimir bilan besh soat davomida tinchlik shartnomasini muhokama qildik

Yaponiya bosh vaziri Sindzo Abe Rossiya prezidenti Vladimir Putin bilan ikki davlat o‘rtasidagi tinchlik shartnomasi bo‘yicha muhokama besh soat davom etganini xabar qildi. Bu haqda RIA «Novosti» ma'lum qilmoqda.

«Biz Vladimir bilan bu safar menga qadrdon bo‘lgan Yamaguti prefekturasida ushbu masalani juda jiddiy muhokama qildik. Jarayon besh soat davom etib, kechki 11.30 gacha cho‘zildi. Yakkama-yakka suhbat davomida ham 95 daqiqa juda ochiq va samimiy suhbatlashdik», - deya aytib o‘tgan bosh vazir.

Uning ta'kidlashicha, tinchlik shartnomasi muammosini hal qilishga bo‘lgan intilish kuchli bo‘lsa ham, bu masala hal etilgani haqida gapirishga hali erta. Sababi «71 yil davomida yechilmagan muammo» tezlik bilan bartaraf etilishi haqiqatdan yiroq.