«Arsenal» hujumchisi Aleksis Sanches shartnomasini uzaytirmayapti va u 2017 yilning yozida Turinning «Yuventus» jamoasi safida paydo bo‘lishi mumkin.
Chililik futbolchining londonliklar bilan shartnomasi 2018 yilgacha tuzilgan, lekin tomonlar shartnomani uzatirish masalasida kelisha olishmayapti.
Futbolchi 28 yoshda va Yevropa miqyosida yutuqlarga erishishni istamoqda.
Tuttosport ma'lumotiga ko‘ra, turinliklar jamoasi 6 oydan keyin jamoani tark etishi kutilayotgan Mario Manjukich o‘rnini aynan Sanches bilan to‘ldirmoqchi.
Ushbu futbolchi uchun Italiyaning boshqa bir jamoasi «Inter» ham qiziqish bildirmoqda va uning transferi uchun 150 mln yevro sarflashga tayyor.
Joriy mavsumda Sanches «Arsenal» safida APLning 18 uchrashuvida maydonga tushgan va 12 gol urib, 5 golga hammuallif bo‘lgan.
Ma'lumot uchun, ushbu futbolchi 2007-2011 yillarda Italiyaning «Udineze» jamoasida to‘p surgan. 2011 yilda «Barselona» uni 26 mln yevro evaziga sotib olgan, 2014 yilning yozida u 42,5 mln yevro evaziga London jamoasiga transfer qilingandi.
