7,5 million so‘mdan oshiq nafaqa pullarini o‘zlashtirgan mahalla raisi fosh etildi

Karimjon Boboyev (ism-familiyalar o‘zgartirilgan) mahalladoshlari bildirgan ishonchi oqlay olmadi. Negaki, uning avvalgi faoliyati yon-atrofdagilar nazdida fidoyilikning bir ko‘rinishi bo‘lgan ekan.

“Huquq” gazetasining yozishicha, bir necha yil avval mahallaga rais saylanayotganda unga ishonch bildirishdi, oqsoqol sifatida mahalla ahlining “issiq-sovug‘i”da birga bo‘ladi, deb o‘ylashda.

Karimjon-chi?... Bir muddat ana shu ishonchni oqlash ko‘yida yelib-yugurgandek bo‘ldi. Keyinroq esa qabuliga nafaqa puli tayinlab berishni iltimos qilib keluvchilar ko‘paydi-yu, o‘zgardi-qoldi. Qanday bo‘lmasin, ana shu pullarga ega chiqish, qo‘lga kiritish haqida bosh qotira boshladi. Ishonchni unutdi.

Nihoyat, yo‘lini topgandek bo‘ldi. U 2014 yilning yanvar oyidan dekabr oyiga qadar mahallaga ijtimoiy nafaqa so‘rab ariza bergan fuqarolarga nafaqa tayinlangach, ularning pullarini o‘zlashtirish harakatiga tushdi. Bunga erishdi ham. Ya'ni u ana shu muddat ichida yetti nafar fuqaroga qaydnomalarni qalbakilashtirgan holda 7 mln. 649 ming so‘mlik ijtimoiy nafaqa tayinlab, ushbu pullarni qo‘lga kiritdi.

Aftidan, K.Boboyev shu qilmishi bir kuni albatta fosh bo‘lishidan bexabar edi, chog‘i. Mahallada o‘tkazilgan tekshirishda uning noqonuniy xatti-harakatlari oshkor bo‘lib qolgach, tipirchilab qoldi. O‘zini oqlash maqsadida turli bahonalar izlashga tushdi. Biroq hech biri naf bermadi. U qonun doirasida jinoiy javobgarlikka tortildi.