Tongda otilgan o‘q
2026 yilning 12 marti. Ro‘za kunlari. Soat taxminan 4:00. Mingbuloq tumanidagi Qorashahar mahallasida yashovchi Mahmud (maqoladagi barcha ismlar o‘zgartirilgan) saharlik qilish niyatida uyg‘onib, tashqariga chiqdi.
Atrof qorong‘i, faqat hovlining chiroq yoqilgan qismi yorug‘ edi. Mahmud yuz-qo‘lini yuvishga chog‘langan paytda kutilmaganda ayvon tomondan miltiq ovozi eshitildi. Unga chamasi 10 metr naridan kimdir o‘q uzgandi.
Barchasi soniyalar ichida sodir bo‘ldi: Mahmud nima bo‘lganini anglamay ham qoldi va ko‘ksini changallab yiqildi. U hushidan ketgandi. Miltiq ovozini eshitgan ayol uydan yugurib chiqdi va erining qonga belanib yotganini ko‘rdi. U shovqin ko‘tarib, atrofdagilarni yordamga chaqira boshladi.
Bu paytda miltiq ko‘targan odam hovliga qanday yashirincha kirgan bo‘lsa, shunday chiqib ketgandi.
Hodisa joyiga qo‘ni-qo‘shnilar yig‘ildi. Mahmud tezkorlik bilan shifoxonaga olib ketilib, jonlantirish bo‘limiga yotqizildi. O‘z vaqtida ko‘rsatilgan tibbiy yordam natijasida uning hayoti saqlab qolindi.
Mulk nizosi
Mahmudning otib ketilgani xabari tongda butun mahallaga tarqaldi. Odamlar uni kim otganini muhokama qilishardi. Ko‘p o‘tmay, bu ishni kim qilgani oydinlashdi: u begona emas, Mahmudning 73 yoshli amakisi Mansur Hamroyev edi.
Amaki o‘z jiyani bilan uy masalasida nizolashib kelgan. Garchi egalik huquqi Mahmudning otasiga tegishli bo‘lsa-da, Mansur Hamroyev uyning bir qismi o‘ziga tegishli ekanini da’vo qilib kelgan.
Mansur Hamroyev 2025 yil 22 may kuni Namangan tumanlararo ma’muriy sudiga ariza kiritgan. U arizada Mingbuloq tumani hokimining 2020 yil yanvardagi qarori bir qismini haqiqiy emas deb topishni so‘ragan. Biroq sud uning da’vosini rad etgan. Amaki bundan qattiq g‘azablangan va ushbu holatda jiyanini aybli deb hisoblab, uni o‘ldirish va uyga ega chiqish bo‘yicha reja tuzgan.
Qabristondagi miltiq
Mansur Hamroyev qabristonda ishlagan. U qabristondagi binoda sandiq ichida ruxsatnomasi bo‘lmagan ov miltig‘i va bir dona o‘q saqlab kelgan.
Amaki ana shu ov miltig‘i bilan qurollanib, 12 mart kuni yarim tunda jiyanining uyiga kelgan. U hovliga yashirincha kirib, uyning ayvon qismiga berkingan hamda Mahmudning uydan chiqishini kuta boshlagan.
Ko‘p o‘tmay jiyani tashqariga chiqqan va xonadonning hovli qismida yuz-qo‘lini yuva boshlagan. Shunda Mansur Hamroyev qulay fursat kelganini tushunib, ov quroli bilan jiyaniga qarata o‘q uzgan. So‘ngra jiyanining turmush o‘rtog‘i yugurib chiqib shovqin ko‘tara boshlaganidan qo‘rqib ketib, hodisa joyidan qochib yashiringan.
