Bosh prokuratura huzuridagi departamentning Namangan shahri bo‘limi xodimlari tomonidan tezkor tadbir o‘tkazildi.
Unda Byudjetdan tashqari pensiya jamg‘armasi Namangan shahar bo‘limi bosh mutaxassisi J.A. ikki nafar fuqaroni yoshga doir nafaqaga chiqarish hamda ularga to‘lanadigan nafaqa pullari miqdorini oshirib berishni va’da qilgani aniqlangan.
Ma’lum qilinishicha, mutaxassis ushbu masalalarni hal qilib berish evaziga 200 AQSh dollari va 4,8 mln so‘mni firibgarlik yo‘li bilan olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 25 va 168-moddalari (firibgarlikka suiqasd qilish) bilan jinoyat ishi qo‘zg‘atilgan.
Hozirda jinoyat ishi doirasida tergov harakatlari olib borilmoqda.
