Kasb-hunar kollejlarida ikkinchi mutaxassislik bo‘yicha o‘quv kurslari tashkil etiladi

Yoshlarni qo‘shimcha kasb-hunar o‘rganishlarini tashkil etish, ularning qonuniy huquqlarini ta'minlash, mehnat bozorida malakali mutaxassislar salmog‘ini oshirish hamda ularni o‘z mutaxassisligi bo‘yicha ish bilan band qilish bo‘yicha O‘rta maxsus, kasb-hunar ta'lim markazi tomonidan ish beruvchi korxona va tashkilotlar bilan hamkorlik ishlari mustahkamlanib borilmoqda. 

Yoshlarga o‘zlari qizziqan mehnat faoliyati bilan shug‘ullanishlari uchun zarur bo‘ladigan kasbiy bilimlarni o‘rganish imkoniyatini kengaytirish maqsadida kasb-hunar  kollejlarida 140ga yaqin kasblar bo‘yicha to‘lov-shartnoma asosida o‘qitish yo‘lga qo‘yilmoqda. 

2016 yil 28 dekabr kuni yoshlarga kasb-hunar o‘rgatish maqsadida O‘zbekiston Respublikasi Vazirlar Mahkamasi tomonidan kasb-hunar kollejlariga umumiy o‘rta ma'lumot (11-sinf) va o‘rta maxsus, kasb-hunar ma'lumotiga ega shaxslarni to‘lov-shartnoma asosida qabul qilish rejalari tasdiqlandi. Bu borada O‘rta maxsus, kasb-hunar ta'limi markazining buyrug‘i qabul qilindi. 

Kasb-hunar kollejlaridagi ushbu o‘quv kurslari umumta'lim maktablarining 11-sinfini, akademik litseylarni tamomlaganlar yoki boshqa yo‘nalishdagi kasb-hunar kollejlarini tamomlab, ikkinchi mutaxassislik olish istagidagi yoshlar uchun  yaxshi imkoniyat sanaladi. 

Kasb-hunar kollejlarida o‘qishni xohlovchi yoshlar kasb-hunar kollejlariga quyidagi hujjatlarni taqdim etishlari kerak bo‘ladi:

•    Kasb-hunar kolleji direktori nomiga ariza;
•    ma'lumoti to‘g‘risida davlat namunasidagi diplom va diplom ilovasi yoki umumta'lim maktabining 11-sinfini tamomlaganligi to‘g‘risidagi attestati (asl nusxasi);
•    3,5 x 4,5 sm hajmdagi 6 dona fotosurat;
•    № 086-U shakl bo‘yicha tibbiy ma'lumotnoma;
•    pasport va harbiy xizmatga aloqadorligi haqidagi hujjat nusxasi.

Qabul rejasi bilan O‘rta maxsus, kasb-hunar ta'limi markazining internetdagi rasmiy veb sayti (www.markaz.uz) orqali tanishish mumkin. 
Eslatib o‘tamiz, umumta'lim maktablari 9-sinf bitiruvchilarining akademik litsey va kasb-hunar kollejlarida amaldagi tartib asosida 3 yil davomida bepul tahsil olish imkoniyatlari saqlab qolingan.